Суҳроб Норқулов ягона марди хайёт дар ноҳияи Шаҳритуси вилояти Хатлон аст, ки куртаҳои занонаву мардона медӯзад. Ин шуғлро дар наврасӣ аз модараш омӯхт. Таънаю маломати мардум, ки гуё дӯзандагӣ кори зан аст, ӯро дилшикаста накард ва ба кораш идома дод. Суҳроб қабл аз издиҷов ҳамсарашро бо касбаш ошно кард ва куртаҳои арусии арӯсшавандаашро низ худ дӯхтааст.
Ӯ дар хусуси кори дӯзандагӣ, таънаю маломати мардум ва марги узви хонаводааш ба муаллифи jom.tj нақл кард.
АТРОФИЁН: ШУМО МАРДАК ҲАСТЕД, ЧАРО ДӮЗАНДА ШУДЕД?
Тақрибан соати 11:30- и нисфирӯзӣ буд, ки ба деҳаи Ёқуб Каримови ҷамоати деҳоти Худоиназар Холматови ноҳияи Шаҳритус расидем. Суҳробро дар ҳуҷраи корияш саргармӣ кор дидем. Матоъҳои зиёди дӯхтаву нодӯхта овезон буданд, ки мегуфт тақрибан 60 либос барои дӯхтан дорад.
Хонаводаи Норқуловҳо ҳудуди 20 километр дур аз маркази ноҳия зиндагӣ мекунанд, падараш кишоварз буду модараш дӯзанда. Шуғли модар ба дили Суҳроб роҳ ёфт ва оҳиста-оҳиста ба даст сузану ришта гирифт. Аввалин бор тоқӣ дӯхт ва модар кори писарашро таҳсин хонд. Дар хонаводаи Норқуловҳо ба фарқ аз дигар оилаҳо интихоби касб озод буд, ин озодӣ ба нафъи Суҳроб анҷомид.
«Мардум мегуфтанд, ки шумо мард ҳастед, чаро дӯзанда шудед, дигар касбро интихоб накардед?!
Агарчи дигар ҳунарҳо ҳам дорам, вале ин касб ба дили ман наздик. Ба суханони мардум аҳамият надодам, ҳозир ман хушбахт ҳастам, ки мардуми ноҳия маро мешиносад. Ба ҳунарам эҳтиром мегузоранд. Дар хона назди зану фарзандон рисқу рӯзиамро пайдо карда, ба зиндагии хоксоронаи худ идома дода истодаам.»,-нақл кард Суҳроб.
Модари Суҳроб на танҳо курта, балки болишту курпачаҳои қуроқӣ, куртаҳои попурӣ низ медӯхт. Муштариёни зиёд дошт ва ҳамон солҳо даромади хуб ҳам дошт. Суҳроб Норқулов муштариёни кори модарашро дида, итминон ҳосил кард, ки бо аз худ кардани ин ҳунар метавонад аробаи зиндагии ояндаи худро кашонад.
Дар оғози кор Суҳроб ҳангоми андозагирии матоъ аз муштариёнаш шарм мекард, вале оиста-оҳиста одат кард. Муштариёнаш бештар навхонадорон ва муаллимаҳо ҳастанд. Ба гуфтаи худаш аз маркази вилояти Хатлон-шаҳри Бохтар низ муштарӣ дорад, ки тариқи таксӣ матоъҳои худро ба ӯ мерасонанд.
Феълан ин дӯзанда барои мардон шиму костюм ва барои занон куртаҳои одӣ, чакану гулдӯзӣ ва қуроқӣ медӯзад. Арзиши духти курта аз матоъ ва ороиш вобаста аст. Инчунин, ӯ колесияи худро дорад, ки аз ҳукумати ноҳия либосҳои саҳнаваӣ фармоиш мегирад.
Суҳроб дар зиндагӣ барои ҳамсар ва се писараш ҳам марди хонавода асту ҳам дар ҷодаи дӯзандагӣ устод.
«Ҳамсарам матоъдӯзии маро дида, ҳавасаш омад. Матоъҳои нолозимро қайчӣ заду дӯхт ва касбро аз худ кард. Ҳоло ману ҳамсар ва ду писарам аз ин ҳунар ризқ меёбем.«-мегӯяд С. Норқулов.
МАРГИ УЗВИ ХОНАВОДА САНГИНТАРИН ДАРД БУД
Қаҳрамони мо бо маҳсули дастранҷи худ дар чорабиниҳои фарҳангии ноҳиявӣ ва вилоятию ҷумҳуриявӣ иштирок карда, бо диплому сипосномаҳо сарфароз гардидааст. Ҳамин маҳорати баланди касбияш буд, ки соли 2017 мудири бахши фарҳанги ноҳия таъин мегардад.
Марги падару модар ва апаи ҷавонмаргаш Рӯзигул ва тарбияи ду фарзанди ноболиғи ӯ садди амалӣ намудани орзуҳои Суҳроб гардид. Суҳроб марги узви хонаводаро сангинтарин дард медонад. Ӯ як муддат дар шаҳри Душанбе низ куртаҳои попурӣ медӯхт, ки мегӯяд харидори маҳсулоташ хеле зиёд буд.
ҲАДАФИ ОЯНДАИ СУҲРОБ
Ӯ тӯли ду сол дар Бозори марказии ноҳияи Шаҳритус дӯкон дошт ва ҳамроҳи 5 зани хонашин дӯзандагӣ мекард. Баъди оташ гирифтани бозор корашро дар хона идома дод. Зеро, сӯхтор ба ӯ зиёни молӣ расонд.
«Беш аз 60 шогирд дорам ва то кунун хоҳишмандон ҳастанд. Дар миёни онҳо писарон низ буданд, вале онҳо ин касбро душвор дониста азидомаи касбомӯзӣ даст кашиданд.»,- нақл кард Суҳроб.
Амонҷон Муҳиддинов
