Шабакаи иҷтимоии TikTok дар бораи роҳандозии абзорҳои нав хабар дод, ки барои кумак ба волидон дар назорат кардани истифодаи замима аз ҷониби фарзандони наврасашон ва мусоидат ба ташаккули одатҳои солимтари онлайн равона шудаанд. Дар ин бора нашрияи iPhone in Canada хабар медиҳад.
Навоварии асосӣ функсияҳои «Соатҳои хоб» (Sleep hours) ва «Вақт дар дурӣ» (Time Away) хоҳанд буд, ки ба волидон имкон медиҳанд дастрасӣ ба TikTok-ро дар вақти муайяни шабонарӯз, масалан, шабона ё соатҳои дарсӣ масдуд кунанд. Волидон метавонанд ҷадвали бастани дастрасиро муқаррар кунанд, дар ҳоле ки наврасон, дар навбати худ, метавонанд вақти иловагии истифодаро дархост кунанд, аммо қарори ниҳоӣ аз волидон вобаста хоҳад буд.
Илова бар ин, волидон имконият пайдо мекунанд, ки бинанд фарзанди онҳо ба кӣ обуна аст, кӣ ба ӯ обуна аст, инчунин кадом аккаунтҳо баста шудаанд. Ин ба волидон шаффофият ва назорати бештарро аз болои фаъолияти онлайни фарзандонашон дар TikTok таъмин мекунад.
Барои наврасони то 16-сола TikTok функсияи оромшавӣ пеш аз хобро (wind-down feature) ҷорӣ мекунад. Агар онҳо барномаро баъд аз соати 22:00 истифода баранд, дар экран ёдраскунии пурра бо мусиқии оромбахш пайдо мешавад. Агар наврас ба тамошои наворҳо идома диҳад, ёдраскунии дубора пайдо мешавад, ки онро сарфи назар кардан душвортар хоҳад буд, зеро тӯлонӣ ва боисрор аст.
