Манучеҳр Гадоев суратгир, наворбардор, танзимгар буда, корҳои графикӣ низ анҷом медиҳад. Ӯ худро блогер муаррифӣ мекунад ва кораш дар ин ҷода хушнуд кардани мардум аст.
Манучеҳр аз соли 2017 ба блогерӣ рӯй овард ва муҳтавои гуногун истеҳсол менамояд. Чанде пеш бо роҳнамоии ҳамкораш Ҳусниддин, ки саҳифаи Zabir.tj-ро мудирият мекунад, аввалин навори хушҳолкунандаро таҳияву нашр кард. Навори мазкур аз он қисса мекунад, ки соати 3-и шаб бачаҳо ба роҳрӯбони пойтахт ғизо мерасонанд.
Манучеҳр дар кӯчаҳои Душанбе бо либоси махсуси хушнудкунанда, ки одатан дар марказҳои дилхушии кӯдакон дида мешавад, хурду бузургро шод месозад. Ӯ ба мардум ширинӣ тақсим мекунад, онҳоро ба оғуш мегирад, аксбардорӣ менамояд, мерақсад, ёрӣ медиҳад. Моҳи Рамазон дар кӯчаҳо ба мардум тухм тақсим карда буд.
Навори аз ҳама машҳури Манучеҳр он буд, ки аз нуқтаи “Hot-Dog”-фурӯшӣ Hot-Dog харидорӣ ва ба фурӯшанда дароз карда, пешниҳод мекунад, ки пули ғизоро мегирад ё бар ивазаш қуттии рамзиро? Фурӯшанда қуттиро интихоб мекунаду баъди кушодан шоколадро мебинад.
“Ман кӯшиш кардам, ки дар қуттии рамзӣ ончиро гузорам, ки аз арзиши маҳсулоти харидоришаванда бештар қимат дошта бошад то табъи мардум болидатар гардад.”, — илова мекунад Манучеҳр.
Манучеҳр дар таҳияи наворҳояш харҷ дораду фоидаи молӣ ба даст намеорад. Умедвор аст, ки бо беҳтар шудани сифат ва муҳтавои наворҳояш сарпарасте пайдо мегардад.
Ба наворҳои Манучеҳр аксарият шарҳи хуб менависанд.
“Ман аз он хурсандам, ки ба мардум хушҳолӣ мебахшам. Кӯшиш менамоям мавзӯҳои муҳими иҷтимоиро интихоб кунам. Масалан, навори охири мо аз зиёни қиморбозӣ мегӯяд. Ман дар навор, ки як дақиқа аст бо сад сомонӣ 100 адад лото харидорӣ ва як-як мекушоям, ки ҳамагӣ 48 сомонӣ бурд мекунаму халос.”,- меафзояд ҳамсуҳбати мо.
Манучеҳр мегӯяд, ки вазъи ютуберон аз моҳи март инҷониб бад шуд, зеро, шабакаи YouTube пулкоркуниро аз ҳисоби ин манбаъ барои блогерон мутаваққиф кард. Ба бовари ӯ, ин ҳолат ба муҳтаво низ таъсир мерасонад.
Манучеҳр донишҷӯи курси 2-юми Донишкадаи санъати тасвирӣ ва дизайни Тоҷикистон аст. Манбаи даромадаш аккосӣ, кори дизайни графикӣ аст.
Ӯ ба блогерони навкор тавсия медиҳад, ки соҳаро омӯзанд, халоро пайдо ва сипас қадам бардоранд.
Ҳ. Тоҳирӣ
