14 август дар Қасри миллат Президенти кишвар Эмомалӣ Раҳмон ҷоизадорони Бозиҳои XXXIII тобистонаи олимпии Париж-2024-ро, ки бо медалҳои биринҷӣ ба Ватан баргаштанд, бо нишони қадршиносӣ ба ҳузур пазируфт.
Ҳар як ҷоизадори бозиҳои олимпии Париж соҳиби мукофоти давлатӣ — Ордени Шараф дараҷаи II, 200 ҳазор сомонӣ — Ҷоизаи Президенти Ҷумҳурии Тоҷикистон, хонаи истиқоматӣ ва мошини муосири барқӣ гардид.
Болтаев Давлат Рустамович, узви дастаи мунтахаби кишвар оид ба бокс, Раҳимов Темур Бахтиёрович, узви дастаи мунтахаби Тоҷикистон оид ба гӯштини ҷудо, Маҳмадбеков Сомон, узви дастаи мунтахаби мамлакат оид ба гӯштини ҷудо ва Маҳмадзоир Исмоил — президенти Федератсияи ҷудои Тоҷикистон бо ордени “Шараф” дараҷаи ІІ сарфароз гардонида шуданд.
Ҳамчунин ба Болтаев Давлат, Маҳмадбеков Сомон ва Раҳимов Темур аз ҷониби шаҳрдорӣ хона тақдим гардид.
Аз 26 июл то 11 августи соли 2024 дар пойтахти Фаронса — шаҳри Париж Бозиҳои XXXIII тобистонаи олимпӣ баргузор шуд.
Ба барномаи бозиҳо 32 намуди варзиш ворид гардида, 10500 варзишгар аз 206 давлати дунё дар он иштирок карданд.
Тоҷикистон бо се медали биринҷӣ миёни 206 давлати иштирокдор мақоми 79-умро касб кард.
Аксҳо аз сомонаи https://www.president.tj/
