Некрӯз, сарояндаи ҷавони тоҷик, ки иштирокчӣ ва ғолиби озмуни ЭпикФит-и Ҷонӣ маҳсуб мешавад, аз идомаи иштирок ва иҷрои суруди якҷоя бо Ҷонӣ даст кашид.
Дар як видео аз бетаваҷҷуҳии Ҷонӣ нисбаташ эътироз кард ва хитоб намуд, ки барои ӯ ин гуна «луқма» лозим нест.
Вале дар поёни навори Некрӯз дар шабакаи инстаграм яке аз саҳифаҳои марбут ба Ҷонӣ (@jony.realmusic) ин навори Нерӯзро нафратовар унвон кард. «Шахсеро дашном додаӣ, ки ба ту бовар карда, беҳтарин корро бароят кардан мехост!», -омадааст дар шарҳ.
Jony ва VK Clips озмунеро охири соли 2023 оғоз карда буданд, ки як шонс барои кашфи истеъдодҳо унвон мешуд. Ғолиби асосӣ дар яке аз трекҳои албоми навбатии Ҷонӣ бо ин сароянда суруд мехонад.
Қоидаҳо озмун чунин буд: яке аз нусхаи таронаҳои нави Ҷониро аз vk.cc/ct01hF боргирӣ мекарданд ва бо шеваи худ сабт мекарданд – ҳатто байт, хор ё як порчаи мусиқӣ. То 29 декабр видеои худро дар VK Clips бо хэштеги #EpicFit нашр мекарданд.
31 декабри соли 2023 Ҷонӣ эълон кард, ки Некрӯз ғолиб аст ва намунаи суруди Некрӯзро гузошта буд. Ҳамчунин дар телевизиони Жара TV аз тарзи пешниҳод ва ҳаракати Некрӯз тавсиф карда буд.
Аммо гилаи Некрӯз аз беэътиноӣ ва бетаваҷҷуҳии Ҷонӣ ба пайғомҳои ӯст.
“Ман баъди сторисҳои Ҷонӣ навиштам, ки хушбахтам. Изҳори ташаккур кардам. Ду боре, навиштам, ӯ ба ман ҷавоб надод. Баъд аз чанд моҳ ӯ дубора иттилоъро дар бораи ғолиби озмун навишт, ки ба наздикӣ суруди якҷояи мо нашр мешавад, вале маро ишора накард. Ман дар ҷавоб навиштам, ки бесаброна интизорам. Ӯ боз ҷавоб надод. Ман се пайғоми гузоштаамро ҳазф кардам. Пас аз чанд вақт ба ман яке аз менеҷерони Ҷонӣ дар иртибот шуда табрик намуд. Ин нафар гуфт, ҳама саволҳоро ба ӯ метавонам матраҳ созам. Ман ба ӯ навиштам, ки сурудро аз нав сабт кардан зарур аст? Зеро, дар студияе, ки ман сабт кардам, шояд сифати хубе надошт. Шояд ба студияи шумо оям, аз нав сабт намоем. Дар аввал навиштанд, ки албатта, сабт бояд мекунем. Баъд аз чанд вақт нафари дигар навишт, ки сабти дубора лозим нест. Садои худро ба мо фиристед, мо коркард мекунем. Ман ишора кардам, ки ба наздикӣ Маскав меравам, харҷе барои ман лозим нест. Ман омодаам, ки худам харҷҳоямро пӯшонам. Вале гуфтанд, зарур нест…»
Ҷонӣ 28 май бо нашри видеои кутоҳе хабар дод, ки бидуни ҳарфи зиёде дар албоми «EPIC» суруди якҷояаш бо Даниел 31 май нашр мешавад, вале дар бораи Некрӯз чизе нагуфт.
Некрӯз мегӯяд, дастгирии Даниел аз ҷониби Ҷонӣ идеяи ҷолиб аст ва ӯ ба ин тасмим ҳеҷ гуна эътирозе надорад.
«Вале чаро дар директ ба ман офарин нанавишт. Бо ӯ (Даниел) вохӯрд, сабти дубора карданд. Ман эҳсос мекунам, ки Ҷонӣ бо ман фит нахост. Интизор ҳам надошт, ки ман ғолиб меоям. Маро мардуми Тоҷикистон дастгирӣ кард. Ҳама ба ман овоз доданд, ҳамаи Тоҷикистон. Ман аз касе чизе нахостам. Блогерҳо бознашр карданд. Бори дигар ман таъкид мекунам, ки маро ҳамаи Тоҷикистон дастгирӣ кард! Имрӯз аз ин гуна муносибати бад… Ин фитро ба пуштатон занед. (Некрӯз ҳарфҳои қабеҳ истифода мекунад). Барои мо тоҷикон ин гуна луқма лозим нест!»,-хитоб мекунад Некрӯз.
