Пайваста Ҷаббороваи 19-сола дар ин син аллакай миёни мардум қуроқдӯзи касбӣ шинохта шудаву устоди даҳҳо нафар гаштааст. Ҳунари қуроқдӯзиро аз падараш омухтааст. Ҳануз дар 14-солагӣ ба буридану духтани матоъ шуруъ кардааст. Пайваста сокини ноҳияи Қубодиёни вилояти Хатлон аст.
Пайваста меӯяд, интихоби рангу матоъ ва дуруст пайваст кардани онҳо аз нозукиҳоиин навъи ҳунар аст, ки барои рақобатпазир гардидани дастранҷ ҳатман бояд риоя шавад.
Ҳуҷраи кории ин духтари ҷавон бо чодарию курпача ва болиштҳои қуроқии зебои омодакардаи худу падараш ороиш дода шудааст. Ҳар харидоре, ки меояд, онҳоро дида рангу матоъро интохоб карда фармоиш медиҳад.
«Агар бештари ҳунармандон қуроқу курпадӯзӣ ва дигар нозукиҳои ин санъатро аз модар омӯхта бошанд, ман аз падар ёд гирифтам. Ба андешаи ман ҳар як духтар бояд дорои чунин ҳунарҳо бошад, зеро, дар хона метавона даромад ба даст овард.»-таъкид мекунад Пайваста.
Бештари муштариёни ин ҳунарманди ҷавон навхонадорон ҳастанд. Чодарию курпачаҳои рангоранг ва дигар ҷиҳози лозимаро фармоиш медиҳанд.
«Маҳз ҳамин ҳунар маро ба маркази вилоят шаҳри Бохтар, Душанбе ва вилояти Суғд бурд. Мардум қуроқиҳоро дида, хуш қабул мекунанд.»,-нақл мекунад П. Ҷабборова.
Пайваста Ҷабборова курта ва ҷомаҳои кӯдакона низ таҳия мекунад ва дар бозори ноҳия мефурӯшад. Ӯ ҳамчунин ҳунарашро ба духтарони деҳа меомӯзонад.
Амонҷон Муҳиддинов
