Дастаи мунтахаби Тоҷикистон дар Фестивали байналмилалии варзишии донишгоҳӣ, мақоми ҳаштумро соҳиб шуд. Варзишгарони мо 11 медал, аз ҷумла, 4 тилло, 1 нуқра ва 6 биринҷӣ ба даст оварданд.
Расонаҳо менависанд, ки варзишгарони тоҷик дар риштаи бокс 8 медал (3 тилло, 1 нуқра ва 4 биринҷӣ) гирифтанд. Миҷгона Самадова дар мусобиқаи занон дар дар вазни то 57 кило, Абубакр Муродзода (-60 кг) ва Абдумалик Болтаев (-80 кг) — дар байни мардон медалҳои тилло ба даст оварданд. Расул Аҳадов (-67 кг) барандаи медали нуқра шуд.
Фестивали байналмилалии донишҷӯёни варзишгар бо иштироки дастаҳои донишҷӯёни кишварҳои узви БРИКС, кишварҳои узви Созмони ҳамкориҳои Шанхай (СҲШ) ва кишварҳои узви Иттиҳоди Давлатҳои Мустақил (ИДМ) дар Екатеринбург баргузор мегардад.
Мусобиқаҳо аз рӯи 14 намуди варзиш – бадминтон, баскетбол, бокс,шиноварӣ, самбо, гуштӣ, теннис, таэквондо, гимнастикаи бадеӣ ва ғайра баргузор мешаванд.
Донишҷӯёни Озарбойҷон, Арманистон, Беларус, Бразилия, Ҳиндустон, Эрон, Ҷумҳурии Қазоқистон, Ҷумҳурии Қирғизистон, Чин, Муғулистон, Покистон, Федератсияи Русия, Молдова, Тоҷикистон , Туркманистон, Узбекистон, Африқои Ҷанубӣ, Туркия, Камбоча, Непал, Шри-Ланка дар ин фествивал ширкат мекунанд. Шумораи варзишгарон ба 3400 нафар мерасад. Варзишгарони аз 17 то 25-сола ба мусобиқаҳо роҳ дода мешаванд.
Акс аз шабакаи интернет
