Машҳуртарин ҳакер дар ҷаҳон, ки Nokia-ро рахна карда буд, аз дунё даргузашт.
Пажӯҳишгари барҷастаи соҳаи бехатарии иттилоотӣ Кевин Митник (Kevin David Mitnick) дар синни 59-солагӣ даргузашт. Дар ин бора рӯзномаи The New York Times бо истинод ба ширкатҳои Mitnick Security Consulting ва KnowBe4, ки аз ҷониби ин нафар таъсис ёфтааст, хабар медиҳад.
Митник дар Лас Вегас бар асари саратони ғадуди зери меъда дар синни 59-солагӣ ин оламро тарк кард.
Митник бо содир кардани як қатор ҷиноятҳои пурсарусадои сайберӣ дар солҳои 90-ум маъруф шудааст. Вай ширкатҳои телекоммуникатсионӣ ва донишгоҳҳоро ҳакерӣ кардааст. Аз ҷумла, ӯ ба дуздии барномаҳои компютерии Santa Cruz Operation ва системаҳои Motorola ва Nokia муттаҳам мешавад. Митник аввалин ҳакере буд, ки муддати зиёд дар феҳристи кофтукоби FBI қарор гирифт ва пас аз он шӯҳратёр гардид.
Митник соли 1995 аз ҷониби ниҳодҳои истихборотии Амрико боздошт ва ба панҷ соли зиндон маҳкум шуд. Пас аз озод шудан, ӯ ба ҳайси мутахассиси амнияти иттилоотӣ бозомӯзӣ кард ва коршиноси эътирофшудаи ин соҳа шуд, Mitnick Security Consulting ва KnowBe4-ро таъсис дод ва инчунин дар Zimperium мақоми баланд дошт.
Кевин Дэвид Митник 6 августи 1963 дар Лос-Анҷелес ба дунё омада, 16 июли 2023 дар Лас Вегас вафот кард.
