Муродулло Носиров, омӯзгори мактаби №124-и ноҳияи Фирдавсии шаҳри Душанбе дар даври дуюми Олимпиадаи байналмилалии Фаронса сазовори ҷойи аввал гардидааст. Дар ин бораи сардори Раёсати муассисаҳои таҳсилоти томактабӣ ва миёнаи умумии Сарраёсати маорифи шаҳри Душанбе Асомиддин Бобозода ба «Ховар» хабар додааст.
Олимпиадаи мазкур 18 феврал дар Донишгоҳи байналмилалии Марсели Фаронса аз фанҳои математика, физика ва кимиё бо иштироки 112 омӯзгорони беҳтарини Русия, Фаронса, Лаҳистон, Ветнам, Юнон, Тоҷикистон ва дигар давлатҳо баргузор шудааст.
Гуфта мешавад, ки Муродулло Носиров дар Олимпиадаи байналмилалии Авруосиё, ки моҳи январи соли 2023 (онлайн) аз физика, риёзӣ ва кимиё доир гардида буд, сазовори ҷойи сеюм, диплом ва мукофоти пулӣ гардида буд. Дар он 1328 нафар омӯзгорони Тоҷикистон, Туркманистон, Узбекистон, Туркия, Русия, Қазоқистон ва Афғонистон иштирок доштанд.
