Медали тиллои Баҳодур дар Мусобиқаи байналмилалии бокс

Муштзани тоҷик Баҳодур Усмонов дар 40-умин Мусобиқаи байналмилалии бокс дар Финландия сазовори медали тилло гардид.
«Мусобиқа 7-10 апрел дар шаҳри Хелсинкӣ бо иштироки беш аз 100 варзишгар аз кишварҳои Финландия, Норвегия, Шведсия, Эстония, Англия, Уэлс, Шотландия, Тоҷикистон, Қазоқистон, Арманистон, Венгрия, Фаронса, Олмон, Булғористон ва Украина баргузор шуд.»-,хабар медиҳад Кумитаи олимпии Тоҷикистон.
Баҳодур Усмонов дар вазни -63,5кг муҳорибаро аз чорякфинал оғоз карда (дар даври аввал озод буд), бар намояндаи Арманистон Ҳамлет Мнатсаканян бо ҳисоби 5:0 ғалаба кард. Дар нимфинал ҳарифаш аз Венгрия Ричард Ковачро бо ҳисоби 3:2 мағлуб намуд. Сипас, Баҳодур дар финал бар варзишгари Шотландия Риси Лунч бо ҳисоби 4:1 пирӯз гардида, сазовори медали тилло шуд.
Мусобиқаи “GeeВee Boxing Tournament-2022” аз соли 1982 баргузор мешавад. Имсол муҳорибаҳо аз рӯи 4 вазн миёни бонувон ва 11 вазн миёни мардҳо сурат гирифт.