Мақомоти Малайзия эълон карданд, ки алайҳи платформаи иҷтимоии X-и Илон Маск ва бахши зеҳни сунъии он — xAI чораҳои додгоҳӣ меандешанд. Онҳо ширкатҳоро бо нотавонӣ дар таъмини амнияти корбарони чат-боти Grok муттаҳам мекунанд.
Ин тасмим ҳамагӣ чанд рӯз пас аз он гирифта шуд, ки Малайзия ва Индонезия аввалин кишварҳое шуданд, ки дастрасӣ ба Grok-ро масдуд карданд. Сабаби чунин тасмим нигарониҳои афзоянда аз он буд, ки хадамот барои эҷоди тасвирҳои ҷинсии ошкоро ва тасвирҳои бе ризоияти шахсони дар онҳо тасвиршуда истифода мешавад.
Комиссияи алоқа ва мултимедияи Малайзия дар изҳороте гуфт, ки ҳолатҳои сӯиистифода аз Grok барои эҷод ва паҳн кардани муҳтавои зарароварро ошкор кардааст. Ба гуфтаи онҳо сухан дар бораи муҳтавои ҷинсии ошкоро, ғайриахлоқӣ, хеле таҳқиромез ва ҳамчунин тасвирҳои таҳрифшуда меравад, ки бидуни ризоияти шахсони тасвирёфта сохта шудаанд.
Комиссия гуфт, ки дар ҳамин моҳ ба X ва xAI огоҳиномаҳо бо талаби ҳазфи муҳтавои зараровар ирсол шуда буданд, аммо то ҳол чораҳои дахлдор андешида нашудаанд.
Танзимгарон дар ду кишвари Осиёи Ҷанубу Шарқӣ изҳор доштанд, ки чораҳои мавҷудаи назоратӣ барои ҷилавгирӣ аз эҷод ва паҳншавии порнографияи қалбакӣ, бахусус бо иштироки занон ва ноболиғон кофӣ нестанд.
«Ҳукумат дипфейкҳои ҷинсиро, ки бидуни ризоият эҷод мешаванд, ҳамчун нақзи ҷиддии ҳуқуқи инсон, шараф ва амнияти шаҳрвандон дар фазои рақамӣ арзёбӣ мекунад.», — изҳор дошт Меутя Хафид, вазири алоқа ва технологияҳои рақамии Индонезия.
ПИСАНД ОМАД? БО ДӮСТОНИ ХУД МУБОДИЛА КУНЕД!
+1
+1
+1
+1
+1
+1
+1
