Рафти бартарафсозии оқибатҳои офатҳои табиӣ дар вилояти Бадахшонро Президенти кишвар таҳти назорати хеш гирифт.
Бинобар сабаби боридани барфи зиёд тақрибан дар шаҳри Хоруғ, тақрибан соати 11-и рӯз тарма бинои Консулии Афғонистон дар шаҳри Хоруғ ва хонаҳои истиқоматии сокинони кӯчаи Н. Хисрав зери тарма монда, дар натиҷа 8 нафар ба ҳалокат расидаанд. Ҷустуҷӯи чанд нафар беномунишон идома дорад.
Ба иттилои Вазорати корҳои дохилӣ 7 манзили истиқоматӣ зери тарма монда, пурра хароб гашта, 10 хонаи дигар қисман зарар дидааст.
Ҳамзамон 12 нафар ба Маркази ташхиси Хоруғи боло дастрас карда шуда, мутаассифона, вазъи 2 нафар вазнин арзёбӣ мегардад.
Президенти кишвар Эмомалӣ Раҳмон дар робита ба офатҳои табиӣ, аз ҷумла фаромадани тарма дар шаҳри Хоруғи Вилояти Мухтори Кӯҳистони Бадахшон, ки боиси талафоти ҷонӣ ва хисороти моддӣ гардид, ба пайвандону наздикони шахсони ҳалокшуда изҳори амиқи тасаллият намуд.
«Бо супориши Президенти мамлакат муҳтарам Эмомалӣ Раҳмон аз ҳисоби шахсони масъули Ҳукумати Ҷумҳурии Тоҷикистон ва роҳбарони аввали як қатор вазорату кумитаҳо Комиссияи давлатӣ оид ба бартараф кардани оқибатҳои офати табиӣ таъсис дода шуд.»,-хабар медиҳад сомонаи prezident.tj.
Комиссияи давлатӣ вазифадор шуданд, ки дар муҳлати кутоҳтарин оқибатҳои офати табииро бартараф карда, ба оилаҳои зарардида кумаки моддии Ҳукумати Ҷумҳурии Тоҷикистонро, аз қабили маводи хӯрока, сару либоси гарм ва дигар ашёи зарурии рӯзгор дастрас намоянд.
Акс аз шабакаи фейсбук
