Вазорати маорифи Узбакистон ба пешниҳоди хориҷ кардани фанҳои физика ва химия аз барномаи таълимии мактабҳои ин кишвар вокуниш кард.
Чанде қабл ректори Донишгоҳи журналистикаи ин кишвар Шерзод Қудратхоҷаев пешниҳод кард буд, ки фанни физика ва химия аз барномаи таълимии мактабҳо хориҷ карда шавад. Ӯ таъкид намуда буд, ки ба ҷои ин фанҳо дарсҳои креативӣ (халлоқона) ҷорӣ кардан мумкин аст.
Аммо вазири маорифи Узбекистон Ҳилола Умарова берун кардани ин фанҳоро аз барномаи таълим ғайримантиқӣ хондааст:
«Ҳамаи мо хуб медонем, ки мактаб маконест, ки барои гузоштани пояи дониш хидмат мекунад. Дар мактаб муҳандис, духтур, олим ё варзишгари номдор, одамони касбу кори гуногун фаҳм ва донишҳои ҳаётан муҳимро мегиранд. Аз ин рӯ, мактаб бояд барои ҳар як хонанда заминае барои донишҳои асосӣ бошад. Гуфтан мумкин нест, ки физика ва химия барои бачагоне, ки дар оянда фанҳои гуманитариро мехонанд, нолозим аст. Сабаб дар он аст, ки инсон новобаста аз он ки кадом касбро интихоб кунад, бояд донад, ки ҷаҳон дар асоси парадигмаи илмии мавҷуд чӣ гуна аст. Қобилияти тафаккури инсон дар ҷараёни таълими фанҳои бунёдӣ, аз қабили физика ва химия инкишоф меёбад. Шахси дорои чунин тавонмандӣ қодир аст, ки воқеаҳоро таҳлил кунад, дарк намояд ва шарҳ диҳад.»,-таъкид намудааст Ҳилола Умарова.
Қобили зикр аст, ки шаҳрвандони Узбекистон низ дар шабакаҳои иҷтимоӣ аз пешниҳоди ректори донишгоҳи рӯзноманигорӣ интиқод карданд.
Дар акс Ҳилола Умарова ва Шерзод Қудратхоҷаев. Акс аз сомонаи upl.uz
