Шӯрои олимпии Осиё ба хабарнигорони ҷавон барои инъикоси Бозиҳои Осиёии Айчи-Нагоя 2026 ҳамагӣ даҳ билет ё роҳхат медиҳад ва яке аз ин билетҳо насиби Румайза Норова, хабарнигори ҷавони «ҶОМ» гардид. Зулфиқор Гулаҳмадзода, Раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон барои ин муваффақият Румайзаро дар шаҳри Душанбе табрик намуд.
Румайза соли дуюм аст, ки барои пойгоҳи «ҶОМ» матолиби ташреҳӣ (эксплейнер), мусоҳибаву мубоҳиса омода мекунад.
Румайза дар даври дуюми озмуни хабарнигорони ҷавони Бозиҳои Осиёии Шӯрои олимпии Осиё (OCA) — Айчи-Нагоя, ки 6 апрел дар Тошканд ҷамъбаст гардид, пирӯз дониста шуд.
«Румайза аз 17 довталаб пеш гузашта, дар ҳайати дастаи ВАО-и OCA барои инъикоси Бозиҳои Осиёии Айчи-Нагоя 2026, ки моҳи сентябри соли оянда баргузор мешаванд, шомил шуд. Ӯ баъд аз ғолиби якум Мира Регмии Бутан, нафари дуюм аст, ки соҳиби билет шуд.»,-омадааст дар хабари Olympic Council of Asia.
Румайза дар иншои худ дар бораи барандаи медали биринҷии Ҷоми Осиё дар Ҷокарта ва Палембанг Комроншоҳи Устопириён навишта буд:
«Барои 16 сония — ман ҳисоб кардам — парчами мо таваҷҷуҳи ҷаҳонро ба худ кашид.»,-навиштааст Румайза дар иншои худ. Хоҳиши ман барои ширкат дар Бозиҳои осиёии Айчи-Нагоя 2026 аз ҳамин лаҳза сарчашма мегирад. Ман мехоҳам ҳамчун як хабарнигори фаъол амал кунам то ҳикояҳоеро, ки аз хотираҳо мераванд, ҳифз кунам.»
Румайза навиштааст, ки агар ғолиб шавад, интизори лаҳзаест, ки Кураш — намуди анъанавии гӯштии тоҷикӣ — дар Айчи-Нагоя намоиш дода мешавад.
«Ҷаҳон техникаеро меомӯзад, ки гузаштагони мо хеле барвақт ба мерос гузоштаанд. Гуштини анъанавӣ он чизеро нишон медиҳад, ки ман дар Бозиҳои осиёӣ ҷолибтарин меҳисобам, зеро, он нишон медиҳад, ки мероси фарҳангӣ эътибори ҷаҳонӣ ба даст меорад.»
Румайза навиштааст, ки 16-сония диди ӯро тағйир дод ва мақсад гузошт, ки лаҳзаи пирӯзии Тоҷикистонро дар Бозиҳои осиёӣ мушоҳида намояд. «Мехоҳам ҳикояҳои мо ва ҳама ҳикояҳои ногуфта аз тамоми ҷаҳон дар хотираҳо боқӣ монанд.»,-хулоса кардааст Румайза.
