Мақсатой Султоноваи 63-сола беш аз 50 сол аст, ки тоқидузӣ мекунад. Ин зан шабона тоқидӯзӣ мекунад ва рӯзона ба бозор мебарорад. Нархи тоқиҳои дӯхтаи Султонова Мақсатой дар қиёс ба дигар тоқифурӯшон бамаротиб арзон аст.
Ӯ ҳанӯз аз овони кӯдакияш ба кори модараш зеҳн монда, ин ҳунарро аз модар омӯхт. Гузаштагони Мақсатой низ тоқидӯз будаанд. Мақсатой танҳо як навъи тоқӣ-тоқиҳои чоргули мардона омода мекунад.
Ӯ пас аз хатми литсейи дӯзандагии шаҳри Истаравшан 8 сол дар як корхонаи дӯзандагии ин шаҳр фаъолият намуда, ин муддат борҳо ба ифтихорномаву мукофотпулиҳо сарфароз гардонида шудааст. Бо амри тақдир, ӯ дар оилае арӯс шуд, ки онҳо низ ба дӯзандагӣ, махсусан ба тоқидӯзӣ машғул буданд. Тоқидӯзӣ барои Мақсатой Султонова натанҳо як воситаи рӯзгузаронӣ, балки муҳимтарин ҷузъи зиндагӣ гардидааст. Зеро, ӯ бо ин ҳунараш чор фарзандашро хонадор карда, инчунин як қатор мушкилоти молиашро рафъ намудааст.
Ин зани ҳунарманд соҳиби 4 фарзанд (ду духтар, ду писар) ва 12 набера мебошад. Духтаронаш низ касби модари хешро интихоб намуда, ҳамарӯза машғули тоқидузӣ ҳастанд ва ба нақли худаш ҳоло набераҳояш низ ба ин касб таваҷҷуҳ доранд.
“Вақте духтаронам хурд буданд, ҳар гуна латтапораҳоро мегирифтанду медӯхтанд. Ҳар гоҳе маро машғули тоқидӯзӣ медиданд, наздам менишастанду ба корам зеҳн мемонданд. Ҳамин тавр, бо гузашти вақт онҳо ҳам ин ҳунарро омӯхта, аллакай ба пурагӣ аз уҳдаи ин кор мебароянд.”,- мегуяд Мақсатой Султонова.
Мақсатой чандин шогирд дорад, ки ин ҳунарро комилан аз худ намуда, бархе коргоҳи худро таъсис додаанд.
Тоқиҳои Мақсатой Султонова ба ҳама гушаву канори кишвар мерасанд. Шавҳари ин зан тоқиҳоро ба Суғду Хатлон ва Рашт дастрас мекунад.
Баҳруллои МАҲМАДШАРИФ
