Наздик ба 50 мутахассиси соҳаи мӯд ва дӯзандагӣ аз корхонаҳои дӯзандагӣ ва муассисаҳои таълимии Тоҷикистон давраи омӯзишии дӯзандагии тарроҳӣ ва дӯхти пиҷаки мардонаро бо истифода аз технологияи муосири тарроҳӣ хатм карданд.
Ин давраи омӯзишӣ дар чаҳорчӯбаи Барномаи ҷаҳонии нассоҷӣ ва дӯзандагии Маркази тиҷорати байналмилалӣ, ки аз ҷониби Ҳукумати Швейтсария маблағгузорӣ мегардад, дар шаҳрҳои Душанбе ва Хуҷанд баргузор гардид. Онро Ирина Филичкина, намояндаи расмии мактаби олмонии либосдӯзии “M.Müller & Sohn” дар Федератсияи Русия баргузор кард.
Ин давраи омӯзишӣ ҳам назария ва ҳам амалияи қолабсозиву таҳияи либос ва дӯхти онро фаро гирифт. Иштирокчиёни он қолабсозӣ ва дӯхтҳои гуногуни либосро мувофиқ бо тарроҳии мӯди замонавӣ омӯхтанд ва тарроҳиву дӯхти гуногуни пиҷакро таҷриба карданд.
