Муҳсинҷон Зубайдов, донишҷӯи cоли сеюми Донишгоҳи давлатии шаҳри Тюмени Федератсияи Русия мебошад.
Муҳсинҷон тариқи квота ба донишгоҳ роҳ ёфта, идрорпулӣ низ мегирад.
Кораш баъд аз дарс кумак ба ҷавонони тоҷик аст.
«Ман дар Тоҷикистон ҳамчун ихтиёрӣ фаъолият мекардам. Ин ҷо низ ин корамро идома медиҳам. Пас аз соли аввали таҳсил Кумитаи ҷавонон ва варзиш номзадиамро ба ҳайси роҳбари донишҷӯёни тоҷики муқими Тюмен пазируфт. Ҳадафи мо аз мушкилоти бачаҳо огоҳ шудану онҳоро то қадри имкон ҳаллу фасл намудан аст.», — нақл кард Муҳсинҷон.
Ҳоло дар вилояти Тюмен зиёда аз 400 донишҷӯи тоҷик дар зинаҳои бакалавр, магистратура, аспирантура ва ординатура таҳсил мекунанд. Муҳсинҷон аз соли 2018 роҳбари ҷавонони шаҳри Тюмен ва аз 2019 роҳбарии ҷавонони тоҷикро дар вилояти Тюмен ба ӯҳда дорад.
«Таҳсил дар мақоми аввал ва кори волонтёрӣ дар мақоми дуввум меистад ва волонтёрӣ ба таҳсилам халал эҷод намекунад.»,-таъкид мекунад ӯ.
Муҳсинҷон пас аз хатми зинаи бакалавр таҳсилро дар зинаи магистратура идома доданист, вале дар шаҳр ё донишгоҳи дигар.
Ҳафизуллоҳ Тоҳирӣ
