Азиза Эгамова мураббии йога аст. Ӯ дорои маълумоти олӣ буда, айни замон донишҷӯи MBA мебошад. Инчунин дар як Оҷонсии машваратӣ мутахассис оид ба кадрҳост.
Рӯзи ӯ соати 4:30 аз тамрини йога бо шогирдон оғоз мешавад ва аз соати 9:00 то шом ба кори асосиаш мепардозад.
«Дар вақтҳои холӣ ман баъзан расмкашӣ мекунам, мусиқиро хеле дӯст медорам, аз хурдӣ мухлиси сурудҳои Майкл Ҷексон будам… Солҳои зиёд (тақрибан аз кӯдакӣ) ҳини фароғат пайваста муаммои Судокуи ҷопониро ҳал мекунам. Дар хона бастаи муаммоҳои ҳал кардамро нигоҳ медорам. Ба ин шуғли ғайриоддӣ рӯзномае боис гардид ва то кунун маҷмӯаи муаммоҳоро харидорӣ менамоям.»,-нақл мекунад Азиза.
Ӯ таъкид мекунад, ки наздиконаш муҳаббати ӯро ба се чиз медонанд: варзиш, Ҷексон ва ғизо.
Азиза на танҳо истеъмоли хӯрокҳои болаззат, балки пӯхтупазро низ дӯст медорад, агарчи ҳоло барои ин кор вақти камтаре дорад.
«Ман ба китобҳо, бахусус, адабиёти классикӣ бо муҳаббат ва ҳаяҷони хос муносибат мекунам. Ман мунтазам мутолиа мекунам, ба клуби китобхонӣ меравам. Ман ароматерапияро дӯст медорам ва медонам, ки омехта кардани кадом равған барои чӣ муфид аст.»
