Як навраси 16-солаи тоҷик ҳанӯз аз 5 соли қабл ба барномасозӣ шурӯъ кард ва то кунун чандин барномаи ӯ дар Play Market дастрас аст.
Барномасозӣ шуғли муосир ва сердаромад буда, талабот ба мутахассисони ин соҳа зиёд аст. Солҳои охир тавваҷуҳи наврасону ҷавонон ба ин соҳа афзӯда, марказҳои омӯзиши барномасозӣ низ зиёд мегарданд.
Иқбол Темирхоҷаеви 16-сола яке аз дилбастагони ин соҳа аст. Феълан хонандаи синфи 10-уми мактаби хусусии «Гулчини маърифат» мебошад.
Иқбол барои системаи Android барнома месозад ва айни ҳол 6 барномаи сохтаашро дар Play Market ҷой додааст. Аз ҷумла, «Қонуни маориф», «Ҷаҳони бофаросат», «NUN.tj», «Dono», «ТехноЗнаток» ва «Парчам». Ин барномаҳоро беш аз 8 ҳазор кас боргирӣ кардаанд.
«Яке аз барномаҳое, ки аз ҳама зиёд боргирӣ шудааст ин «Қонуни маориф» мебошад, ки беш аз 5 ҳазор муаллим онро истифода мебаранд.», — мегӯяд Иқбол
Лоиҳаи дигари Иқбол-«Dono» номгузорӣ шуда, барои забономӯзӣ пешбинӣ гардидааст. Иқбол ин барномаро дар ҳамоиши байналмилалии
EMERGE — INTERNATIONAL TECH CONFERENCE дар шаҳри Минск муаррифӣ намуда буд.
Довуд Акобиров
