Муҳоҷирати меҳнатӣ як раванди табиист, ки нерӯи кории кишварҳои ҷаҳони сеюм аз сар мегузаронанд.
Тибқи иттилои расмӣ, аксари корҷӯёни кишвар ба Русия ва қисме ба Қазоқистон, Белорусия сафар мекунанд. Реҷаи бидуни раводид ба ин кишварҳо муҳоҷиронро ба ин давлатҳо моил месозад.
Аммо ҳастанд нафароне, ки бо ин кишварҳо маҳдуд намешаванд, шароити хуб, кори муносиб ва маоши беҳтар мехоҳанд.
Қаҳрамонони навбатии мо, ки таҷрибаи муҳоҷират дар Русияро доштанд, акнун фаротар аз ин кишвар рафтанд.
Низомидин Холбоев, сокини шаҳри Панҷакент буда, пас аз хатми донишгоҳ муҳоҷиратро пеша кард. Чанд сол ба Русия мерафт.
Бо тавсияи дӯстон, аввал ба кишварҳои Аморати Муттаҳидаи Араб ва Арабистони Саудӣ ба кор рафта чанд муддате фаъолият кард. Бо мақсади пайдо намудани имкониятҳои нав тариқи Русия ба Бритониёи Кабир ба кор рафта, муддате онҷо фаъолият намуд.
Ҳоло ба зодгоҳаш-Панҷакент баргаштааст. Муҳоҷирати Низомиддин тӯлонӣ нест ва ҳамасола ба ба дидорбинии пайвандонаш меояд.
Шодмон Ашӯров зодаи ноҳияи Ашти вилояти Суғд буда, дар Русия ба сохтмон машғул буд, вақте қоидаи будубош дар Русияро вайрон кард, ҳаққи ворид шудан ба Русияро аз даст дод. Сипас пайи ҷустуҷӯи кишварҳои нав барои муҳоҷират шуд. Ҷустуҷӯҳои зиёди Шодмон ба ӯ имконият доданд, ки раводиди яксола гирад ва дар Варшава ба кор равад. Айни ҳол Шодмон дар Варшава қарор дорад.
Абдусамад Аминов
