Дастаи “Истиқлол”-и Душанбе дар бозии ниҳоии худ дар марҳилаи гурӯҳии Лигаи қаҳрамонҳои AFC-2022 дар чаҳоргонаи “А” ба бошгоҳи “Шарҷа”-и АМА бо ҳисоби 2:0 пирӯз шуд. Голҳоро Эрик Бокум ва Владислав Касминин вориди дарвозаи рақиб намудаанд.
Ҳафтаи гузашта Дастаи “Истиқлол”-и Тоҷикистон дар даври панҷуми мусобиқаи гурӯҳии Лигаи қаҳрамонҳои AFC (Конфедератсияи футболи Осиё)-2022 дар минтақаи “Ғарб” аз тими “Ал-Райён”-и Қатар бо ҳисоби 0:1 шикаст хӯрд.
Бозии қаҳрамони Тоҷикистон — «Истиқлол» бо муқобили “Ал-Райён” шаби 23-юми апрел дар шаҳри Риёзи Арабистони Саудӣ, дар Варзишгоҳи байналмилалии ба номи Шоҳ Фаҳд, баргузор шуд. Голи ягонаро Йоҳан Боли дар охири бозӣ, дар дақиқаи 90-ум, зад.
Ин бохти панҷуми паиҳами “Истиқлол” дар мусобиқаи гурӯҳии Лигаи қаҳрамонҳои AFC-2022 дар минтақаи “Ғарб” дар гурӯҳи “А” ба шумор мерафт.
Футболбозони тоҷик, ки бидуни имтиёз дар ҷадвали гурӯҳи «А» дар ҷои охирин қарор доранд, сарфи назар аз натиҷаи бозии даври охирин бо “Шарҷа”-и Имороти Муттаҳидаи Араб аз ҳаққи ширкат дар даври ҳаштякниҳоии мусобиқа маҳрум шуданд.
Бозии дигари даври панҷум, ки 23-юми апрел миёни дастаҳои “Шарҷа” ва “Ал-Ҳилол” доир гардид, бо ҳисоби мусовии 2:2 хотима ёфт.
