Аврангзеб Асрориён яке аз ҷавонони муваффақи тоҷик аст, ки чандин забони хориҷиро медонад ва дар озмуну олипиадаҳои байналмилалӣ дастовардҳои зиёде доштааст. Акнун зинаи бакалврро дар яке аз донишгоҳҳои бонуфузи Ҳоланд (Нидерланд) ба поён расонида, як ширкати худро таъсис додааст.
Ӯ ҳоло магистри Донишгоҳи Амстердам аст. Аврангзеб, соҳаи иқтисод ва рушди устуворро пайгирӣ дорад ва мегӯяд, таъсиси ширкат маҳсули бардоштҳояш аз таҳсил дар зинаи магистр аст. Ширкати навтаъсис ба коркарди дубораи боқимондаҳои қаҳва ихтисос дода шуда, асосан маҳсулоти косметикӣ тавлид мекунад. Ин корро Аврангзеб бо як ҷавони дигари тоҷик анҷом медиҳад ва якҷо дар фикри тавсеаи ширкати хеш мекӯшанд.
Аврангзеб Асрориён, зодаи шаҳри Душанбе буда, дар оилаи фарҳангӣ ба воя расидааст. Падари ӯ Ҷонибек Асрориён, муаррих, фарҳангшинос ва журналисти шинохтаи тоҷик аст.
Муваффақиятҳои ин ҷавон ҳанӯз аз даврони наврасиаш шурӯъ шуда буд. Ӯ ғолиби озмуни «Стипендияи истеъдоди шаҳрванди ҷаҳон» дар Аврупо шуд. Ин озмун 5 ҳазор евро ҷоиза дошт. Иншое, ки ӯ дар ин озмун бо унвони «Я человек мира» навишта буд, ӯро ғолиби ин озмун кард. Кумита оид ба стипендияи донишгоҳии Гаагаи Шоҳигарии Ҳоланд Аврангзебро дар қатори чанд ҷавони беҳтарини ҷаҳон шомил карда буд. Бо ҳамин роҳаш барои таҳсил дар Аврупо боз шуд.
Ӯ донандаи 5 забони хориҷӣ аст. Инчунин соли 2018 дар Чемпионати ҷаҳон оид ба футбол дар Русия ба ҳайси тарҷумон миёни намояндагони ФИФА ва сарони кишварҳои иштироккунанда интихоб гардида, аз иҷрои ин масъулият ба хубӣ баромад ва таҷрибаи хубе низ андухт.
Аврангзеб Асрориён дар мактаби № 42 таҳсили иботидоӣ гирифта, баъдан дар литсейи тоҷикию – туркии иктисодӣ таҳсилро идома додааст. Дар чандин озмуни байналмилалӣ дар ИМА, Қиргизистон, Туркия, Ирланд ва Қазокистон ширкат ва ҷойҳои намоёнро ишғол кардааст.
Баъд аз хатми мактаби миёна дар Тоҷикистон ба Амрико рафта, дар Иёлоти Массачусетс синфи 12-ро хатм кард. Пас аз таҳсил дар Амрико ба Донишгоҳи Лейдени Шоҳигарии Нидерланд аз тариқи барномаи Равобити байналмиллалӣ/ҷахоншиносӣ бо ихтисоси аврупошиносӣ шомил шуда, онро моҳи августи соли ҷорӣ (2021) ба итмом расонид.
Баъд аз хатми зинаи бакалавр ба магистратура дар Донишгоҳи Амстердам дохил шуд ва холо он ҷо таҳсилро идома дода истодааст. Дар ин Донишгоҳ дар факултаи Иктисод ва рушди устувор таҳсил мекунад.
Фирдавси Низом
