Ба Яндекс иҷоза дода шуд, ки аввалин таксиҳои бидуни ронандаро дар Маскав роҳандозӣ намояд. Дар ин бора дафтари матбуоти Вазорати рушди иқтисоди Русия хабар додааст.
Ба иттилои ин вазорат, қарори ҳукумат «Дар бораи муқаррар намудани низоми таҷрибавӣ-ҳуқуқӣ дар соҳаи инноватсияҳои рақамӣ ва тасдиқи барномаи таҷрибавӣ-ҳуқуқӣ дар соҳаи инноватсияҳои рақамӣ барои истифодаи воситаҳои нақлиёти худкор» қабул карда шуд.»
Пас аз 20 рӯз, аз рӯзи нашри қарор, Яндекс метавонад кори мошинҳои беронандаро дар ду шакл оғоз кунад: бо ронандаи озмоишӣ дар салон (дар курсии мусофир, паҳлӯи курсии ронанда) ва бидуни ронандаи санҷишӣ дар кабина, бо қобилияти пайваст кардани оператор барои идораи фосилавӣ дар ҳолати зарурӣ.
Тибқи реҷаи таҷрибавӣ, мошинҳои беронанда дар кӯчаҳои Маскав, дар шаҳри Иннополиси Тотористон ва дар қаламрави федералии Сириус метавонанд бо ронандаи озмоишӣ дар кабина ва бидуни ҳузури ӯ идора карда шаванд.
Таҷриба имкон медиҳад, ки мошинҳои бесарнишин ҳамчун такси дар Маскав истифода шаванд. Нахустин минтақа барои роҳандозии таксиҳои бесарнишин минтақаи Ясенево — байни истгоҳҳои метрои Ясенево, Новоясеневская ва Боғи Битсевский буд. Тариқи замимаи Yandex Go имкони занг задан ба таксии бидуни ронанда вуҷуд дошта, Яндекс ваъда кардааст, ки арзиши сафар аз арзиши таксиҳои муқаррарӣ фарқ намекунад.
Акс аз сомонаи ixbt.com
