Додситони кулли иёлати Техас Кен Пакстон алайҳи ширкати OpenAI ва роҳбари он Сэм Алтман ба додгоҳ шикоят бурдааст. Ӯ онҳоро ба гумроҳ кардани корбарон дар масъалаи бехатарии зеҳни сунъии таҳиякардаи ширкат ва андешидани чораҳои нокифоя барои ҳифзи одамон аз зарари эҳтимолии истифодаи чунин технологияҳо айбдор мекунад.
Ба назари мақомоти Техас, OpenAI, аз ҷумла, корбаронро ба қадри кофӣ огоҳ накардааст, ки моделҳои зеҳни сунъии ширкат метавонанд одамонро ба расонидани зарар ба худ ташвиқ кунанд ё бо корбарон, аз ҷумла кӯдакон, муносибатҳои носолим ба вуҷуд оранд.
«Ман барои ҳифзи сокинони Техас аз зарари зеҳни сунъӣ мубориза мебарам ва намегузорам, ки ширкатҳои пуриқтидори технологӣ худро болотар аз қонун ҳисоб кунанд», — гуфтааст Пакстон.
Мақомоти Техас талаб доранд, ки дастрасии ноболиғон ба системаҳои зеҳни сунъии OpenAI манъ карда шавад. Ҳамчунин, ширкат набояд моделҳои нави худро дар Техас то замоне ба кор дарорад, ки комиссияи мустақили коршиносон онҳоро санҷида, арзёбӣ накунад.
Илова бар ин, мақомот талаб доранд, ки барои ҳар як қонуншиканӣ 10 ҳазор доллар ҷарима ситонида шавад.
Дар OpenAI аллакай изҳор доштаанд, ки барои коҳиш додани хатарҳои зеҳни сунъӣ ва таҳияи механизмҳои иловагии муҳофизат пайваста бо коршиносон ҳамкорӣ мекунанд. Ширкат ҳамчунин омодагии худро барои ҳамкорӣ бо мақомоти Техас ҷиҳати таҳияи сиёсати мувофиқ дар ин соҳа баён кардааст.
Қаблан низ баъзе иёлатҳои ИМА алайҳи OpenAI ба додгоҳ муроҷиат карда, тафтишот оғоз намуда буданд. Аз ҷумла, моҳи август додситони кулли иёлати Алабама бо сабаби ҳамлаҳои ҳакерӣ бо истифода аз зеҳни сунъӣ алайҳи ширкат тафтишот оғоз кард.
