Мубориз Аҳадов корбурди муфиди техналогияи муосирро ба ҳамсолонаш меомӯзонад.
Ӯ иттилои азбаркардаашро тариқи YouTube, Instagram ва Tik Tok ба обуначиҳояш қисмат мекунад.
Мубориз 29 сол дошта, ҳоло дар Федератсияи Русия кору зиндагӣ менамояд.
“Машваратдиҳӣ ё худ омода кардани наворҳо дар шакли “лайфхак” дар зеҳни ман набуд, балки чанде пеш мушкили насбу коркарди барномаи “Чӣ гап” пеш омад. Худам омӯхта, ҷараёни корро сабт намуда дар интернет гузоштам. Наворро мардум хуб қабул карданд ва аз ҳамон вақт омодаву пахши ин гуна наворҳо бароям ба як кори дӯстдоштанӣ табдил ёфт.”, — мегӯяд Мубориз.
Мубориз барои наворҳояш бо ду роҳ мавзӯъ меёбад: худаш навгониҳои олами техникаро ҷустуҷӯ мекунад ё обуначиҳояш ба ӯ муроҷиат мекунанд то муаамояшонро ҳал намояд. Масалан, чӣ тавр паёмҳои ҳазфшударо дар паёмрасони WhatsApp мутолиа кард. Ё чӣ тавр метавон тарзе паём навишт, ки пас аз хондани мухотаб паём худ ҳазф шавад.
Ҳамсуҳбати мо мегӯяд, барои омода кардани як навор ба ӯ вақти зиёд лозим аст. Ӯ мавзӯро интихоб, меомӯзад ва дар таҷрибаи худ амалӣ намуда, сипас сабту танзим мекунад.
Ҳоло қаҳрамони мо аз ин кораш фоидаи молӣ ба даст намеорад, балки аз ҳисоби тиҷорат рӯз мегузаронад.
“Ростӣ, аз шуғлам фоидаи молӣ ба даст намеорам, вале ба ин васила ман метавонам тиҷоратамро сайқал диҳам. Яъне, обуначиҳоям махсус наворҳои машваратии маро бисёр тамошо мекунанд ва ман дар ширкати Алабум ба фурӯши телефонҳо машғулам, ки аз ин тариқ метавонам кори асосиямро тарғиб кунам.”
Мубориз дар бораи тарки ин кораш ҳатто фикр накардааст ва дар оянда нақша дорад, ки то қадри имкон барои беҳтар намудани дониши техникии мардум, махсусан ҷавонон заҳмат мекашад.
Ҳ. ТОҲИРӢ
