Дар намоиши аксҳо, ки шоми 24-уми декабри соли ҷорӣ дар Маркази амрикоии шаҳри Душанбе доир гардид, 14 аккоси ҳаваскор аз саросари кишвар расмҳои беҳтарини хешро ба намоиш гузоштанд.
Ёдовар мешавем, ки ин аксбардорон бо як омӯзиши чаҳоррӯза дар дафтари ТҶ “Хома” ҷалб гардида буданд ва рӯзи сеюми омӯзиш аксҳои онҳо ба намоиш гузошта шуд.
Дар ин намоишгоҳ аккосони ҳавасманд дар бораи таърихи аксҳои хеш қисса карданд.
Даррен Тис, сардори Раёсати робита бо ҷомеаи Сафорати ИМА ваъда дод, ки дар ояндаи наздик боз чунин намоишгоҳ доир хоҳад шуд.
Шаҳло Акобирова, директори ТҶ «Хома» изҳори умедворӣ намуд, ки бо гузаштани давраи омӯзишии нозукиҳои аксбардорӣ сифати расмҳои ин ҷавонони аксбардор боз ҳам беҳтар мегардад. Зеро, давоми ҷаҳор рӯз бо онҳо Нозим Қаландаров ва Алишер Примқулов- ду аккоси ботаҷриба кор карданд…
Дар намоишгоҳ ба иштирокчиёни омӯзиши асосҳои аккосӣ шаҳодатномаи хатм ботантана супурда шуд.
Эълони ғолиби беҳтарин акс ва тақдими ҷоиза низ дар ин чорабинӣ сурат гирифт. Бо баҳодиҳии ҳайати ҳакамон ғолиб Абдусамад Аминов, аз шаҳри Панҷакент дониста шуда, ба ӯ дастгоҳи аккосӣ тақдим гардид.
Абдусамад аксбдори касбӣ набуда, муаллим мактаб будааст ва дар вақтҳои фориғ аз кори мактаб дар тӯю маъракаҳо аккосӣ ва наворгирӣ мекардааст.
Дар намоишгоҳ ду акси ӯ-яке аз лаҳзаи гузаштани паради низомӣ ва дуввумӣ рақси духтаракони наврас пешниҳод гардида буд, ки ҳайати ҳакамон писанд омадааст…
Нурофарид, ҷавондухтаре аз шаҳри Хорӯғ низ аксҳои ҷолибу диданиеро пешниҳод намуда буд, ки бештар ба Даррен Тис, корманди Сафорати ИМА дар Душанбе писанд омадааст. Бинобар ин, Даррен тасмим гирифт, ки дастгоҳи аксбардории шахсии хешро ба Нурофарид ҳадя намояд.
