Лола Қодирова 15 сол дар Русия рӯзҳои сахти бекасиву дур аз муҳаббати фарзандонро чашид. Акнун пас аз ранҷу азоби муҳоҷират ҳоло дар зодгоҳаш-Ашт ба чорводорию боғпарварӣ машғул буда, дӯстдори гов аст, бо ин ҷонвар рози дил мекунад ва ба мисли фарзандонаш онҳоро тарбия менамояд.
Деҳқонзан баъди муҳоҷирати тӯлонӣ дар Ватан 2 гектар боғ гирифт, зардолу мепарварад, гандум мекорад, бо алафи зери дарахтон чорводорӣ мекунад.
Ӯ бо маблағи ҳамин боғу чорво фарзандонашро мехӯронад, ба мактаб мефиристад.
Ба чорвову дарахтон меҳр баст, чун зиндагияш аз пушти он тағйир ёфт. Лола Қодирова дӯстдори гов аст ва бо ин ҷонвар рози дил мекунад ва ба мисли фарзандонаш тарбия мекунад. Ба говҳояш Бозорбой, Хонзода, Мая ва Лала ном гузошта ин ҷонвари хонагиро дӯсти беҳтаринаш меҳисобад. Аз ошхонаҳои ноҳия боқимондаи таъомҳоро барои говҳояш ҷамъоварӣ ва дар деги калоне хӯроки махсус таҳия мекунад. Ба гуфтаи деҳқонзан гов ба душворӣ ба боварии инсон медарояд, бисёр меҳрубонӣ бояд кард.
“Ман бо меҳр дар як рӯз назди говҳо то даҳ маротиба меоям ва маро мебинад. Ламс мекунам, гап мезанам ин ҷонварҳо низ гапро мефаҳманд. Инсон ба душворӣ ба боварии гов медаромадааст, ба сагу гурба зудтар. Гов бениҳоят ҷонвари доно аст. Барои ба боварии гов сазовор шудан хело меҳрубонӣ бояд кард. Гуруснаву ташна гузоштан лозим нест, сари вақт сӯзандору мегирад. Ҳоло ҳам омада дархости харидан мекунанд, лекин дилам намешавад, ки фурӯшам. Рӯзи хурсандиву ғам ҳаст, гоҳ пул доред гоҳ не. Ба бозор мебароред ин ҷонварҳо ҳам сарват аст.”
Хонаи ин оила хеле ғайриоддӣ буда, бо оғилхонаи дӯстони безабонаш девор дар миён аст. Кулбаи хоксоронаи гилин, аммо муҷаҳҳаз бо тирезаи замонавӣ, дохилаш бо матоъ ва зарфҳои миллӣ оро ёфтааст. Шабеҳи хонаи қадимаи бошандагони деҳот аст, ки ҳифз шудааст. Дастархони ин оила бо хӯрокҳои миллӣ ва меваҳои шаҳрбори боғ ороста шуда, аз чунин зиндагӣ Лола лаззат мебарад.
Ҳалим Ҷураев
