Сироҷиддин Файзалиеви 20-сола орзу дошт нутқаи фурӯши «Hot dog» боз кунад. Ҳамагӣ чанд ҷумлаи роҳбари Алиф Банк Абдулло Қурбонов ба ӯ ангеза дод, ки фикрашро тағйир дода, мақсади бузургтаре назди худ гузорад. Ҳоло Сироҷиддин маркази забономӯзӣ боз кардааст.
Сироҷиддин Файзалиев, донишҷӯи соли 3-юми Донишгоҳи давлатии Бохтар дар макази маъмурии вилояти Хатлон-шаҳри Бохтар маркази забономӯзӣ таъсис додааст. Ӯ сокини ноҳияи Ҷалолиддини Балхӣ буда, ҳанӯз 20 сол дорад.
Ба гуфтаи ӯ дар водии Вахш алоқамандони омӯзиши забонҳои хориҷӣ, аз ҷумла забони русӣ ва англисӣ нисбат ба чанд соли пеш бештар шудааст.
Дар маркази вилояти Хатлон-шаҳри Бохтар беш 20 маркази забономӯзӣ фаъолият мекунад. Бо вуҷуди рақобати шадид, Сироҷиддин Файзалиев маркази забономӯзии “Ҷавонон”-ро таъсис дод. Ӯ мегӯяд, корҳои барасмиятдарориро пурра анҷом дода, феълан беш аз 30 нафар дар марказ ба омӯзиш фаро гирифта шудаанд.
Дар ин марказ забонҳои англисию русӣ, чинию олмонӣ ва туркӣ омӯзонида мешавад. Ҳар забономӯз барои як моҳ ба ин марказ бояд 100 сомонӣ пардохт намояд, ки дар тафовут ба дигар марказҳои забономӯзӣ арзон аст.
Сироҷиддин Файзалиев дар аввал нақшаи кушодани дӯкони хурди хӯроквориро кашид, вале баъдтар фикрашро дигар кард.
“Худам донандаи забонҳои русӣ ва англисӣ ҳастам. Вақте дидам, ки алоқамандони омӯзиши забонҳои хориҷӣ зиёд аст, тасмимамро дигар кардам. Ва бо пешниҳоду дастгирии чанд устоди донишгоҳ ин марказро таъсис додам.”,-мегӯяд Файзалиев.
Айни ҳол дар маркази забономӯзии “Ҷавонон” чаҳор донишҷӯи донандаи забонҳои хориҷӣ ба кор ҷалб гардиданд.
Муҳаммад Имомназари 21-сола яке аз онҳост, ки мегӯяд, ҳанӯз донишҷӯи курси дуюм аст ва корашро дар Ватан пайдо кардааст. Ҳоло ба хоҳишмандон забони русиро меомӯзонад. “Хурсанд ҳастам, ки соҳиби ҷой кор ва маош гардидам. Бояд чунин марказҳо зиёд бошад то ҷавонону наврасон ба омӯзиши забонҳои хориҷӣ машғул гарданд. Фаъолияти марказро ҳанӯз як моҳ нашудааст, вале алоқамандони омӯзиши маркази мо рӯз аз рӯз афзӯда истодааст”,- нақл мекунад Муҳаммад Имомназар.
Дар вилояти Хатлон марказҳои забономӯзӣ кам нестанд, вале қаҳрамони мо Сироҷиддин Файзалиев бовар дорад, ки дар оянда сафи шогирдонашон зиёд шуда, дар инҷода муавффақ мешавад.
Амонҷон Муҳиддинов
