Вайс Асоев: кашидани портретро бад мебинам
Вайс Асоев, рассом, тарроҳи курта, лоиҳакаш ва дизайнер-интерер буда, вале миёни ҳеҷ кадоме аз ҳунарҳояш фарқ намегузорад ва намедонад, ки барояш кадоме аз онҳо касби асосӣ ҳастанд.
Қаҳрамони мо хатмкардаи Коллеҷи рассомии ба номи Мирзораҳмат Олимов буда, инчунин Академияи сохтмонӣ ва меъмории шаҳри Алмааторо бо ихтисосӣ меъмор ба поён расонидааст.
Вайс пас аз хатми мактаби олии шаҳри Алмаато ба Ватан баргашта, дар чанд ширкати сохтмонӣ меъморӣ намудааст. Вале бинобар камии маош кори дӯстдоштаашро тарк кард:
“Аз хӯрдӣ кореро анҷом медиҳам, ки бароям писанд аст. Ҳоло ҳам кори дӯстдоштаамро мекунам ва ҳамчунин фоидаи моддӣ ба даст меорам.”
Вайс бо тарроҳони муваффақи кишвар ошноӣ дорад. Нахуст Хуршед Сатторов пешниҳод кард, ки дар студияаш рассомӣ кунад, яъне, тарҳи либосҳоро кашад. Пас аз қатъи ҳамкорӣ бо Хуршед Сатторов бо тарроҳони дигар аз ҷумла, Умед Кучкалиев, Нафиса Имронова ва Зулола Абутуробова ҳамкориро оғоз карда, то ҳол идома медиҳад.
Айни ҳол тарҳи либос меофарад, дизайнер-интерер аст ва ҳам дар девор расм мекашад.
Дар Тоҷикистон тайи 3-4 соли охир рассомӣ дар девор маъмул гашта, мардум ба ин навъи санъат бисёр таваҷҷуҳ мекунанд. Вайс ҳам аз ҷумлаи ҷавонони эҷодкор мебошад, ки наздики 2 сол мешавад, дар девор расм мекашад ва вақти зиёдашро ба ин кор сарф мекунад. Даромади бештараш низ аз ин ҳисоб аст.
“Баъзан фармоишгарон худашон бо идеяи худ муроҷиат мекунанд, ки дар деворашон ин ё он расмро офарем. Ба бархеи дигар мо пешниҳод мекунем, ки ин ё он тасвирро дар девор кашем. Фармоиши тавир дар девор зиёданд. Вале кори заҳматталаб буда, барои офаридани бархе аз ин тасвирҳо як моҳ сарф мешавад.”
Ҳини пиёдагардӣ, дидани фаввораҳо ва дар вақти қаҳванӯшӣ нӯшидан илҳоми эҷодии Вайс меояд.
“Агарчи суҳбат ба одамон бароям нерӯ мебахшад, вале портреткаширо бад мебинам.”,-мегӯяд Вайс Асоев.
Вайс Асоев тарҳи 15 либоси навро рӯйи коғаз оварда, аввалин намоиши либосро дар пойтахт доир карданист. То кунун 10 намоиши расмҳояш дар шаҳри Кӯлоб баргузор гардидаанд.
Ҳафизуллоҳ ТОҲИРӢ
