Мирмуҳсин ба ҳеҷ кишваре сафар накардааст, вале медонад, ки кадом кишвар дар куҷост ва чи қадар аҳолӣ дорад.
Мирмуҳсин Мирдодоеви 14-сола бо донистани марказии маъмурӣ, масоҳату аҳолии 150 давлати ҷаҳон миёни ҳамсолонаш маъруф гардидааст. Ин хонандаи синфи 7 аз шаҳри Бохтар яке аз хонандагоне ҳаст, ки ба фанҳои таъриху география шавқу рағбати зиёд дорад.
Ин хонанда аз синфи сеюм дар озмунҳои шаҳрию вилоятӣ ва ҷумҳуриявӣ иштирок мекунад ва сазовори ҷойҳои ифтихорӣ низ гардидааст.
Қаҳрамони мо-Мирмуҳсин Мирдодоев мебошад, ки дар Литсеи давлатии №1-и шаҳри Бохтар таҳсил мекунад. Ба қавли муаллимонаш, ӯ аз хонандаҳои фаъоли муассиса аст, ки ҳар сол дар озмунҳои вилоятию ҷумҳуриявӣ ширкат менамояд.
Бо поёни соли таҳсил Мирмуҳсин дар хонан худомӯзӣ мекунад: “вақте 7-сола будам, бобоям китобе дошт бо номи “Атласи ҷаҳон” ман онро пурра мутолиа кардам ва аз ҳамон вақт шавқи китобхонӣ пайдо гардид. Вақте ба мактаб омадам ба хондани фанҳои география ва таърих шавқи зиёд пайдо кардам”,-ёдовар мешавад Мирмуҳсин Мирдодоев.
Барои омӯзиш ба Мирмуҳсин бештар муаллимон ва бобою модараш кумак мекунанд. Ҳоло волидайн аз муваффақияти фарзандашон меболанд. Мирмуҳсин барои мукаммал кардани дониши худ натанҳо фанҳои географияву таърих, балки китобҳои мухталифро мутолиа мекунад. “Бо вуҷуди рақибони зиёд, дар озмуни вилоятию ҷумҳуриявии фаннӣ ва “Донояк”иштирок карда, сазовори ҷойи аввал гардидам.”,- қайд кард ӯ.
Ин хонандаи синфи 7 мақсад дорад, ки мактаби миёнаро бо баҳои аъло хатм намуда, дар Донишгоҳи милии Тоҷикистон дар риштаи сиёсат ва идоракунии давлат таҳсил намояд.
Амонҷон Муҳиддинов
