Ҷамолиддин Абдуллозода, вазири тандурустӣ ва ҳифзи иҷтимоии аҳолии Тоҷикистон зимни нишасти матбуотӣ таъкид намуд, ки аз рӯзи аввали ба фаъолият пардохтанаш ба роҳбарони муассисаҳои тиббӣ ҳушдор дода буд, ки бо ин ё он баҳона аз зертобеъони худ маблағ ҷамъоварӣ накунанд. Дар сурати собит шудани чунин ҳолат онҳо қадами худро ба муассисаи тандурустӣ намегузоранд.
Ин вазир таъкид мекунад, ки то ҳол ин мавқеаш тағйир наёфтааст. Дар сурати муроҷиатҳо ва собит шудани ҳолат зертобеъонашро аз кор меронад.
View this post on Instagram
Ӯ ин ҳарфҳоро баъд аз он баён дошт, ки хабарнигорон аз ҳолатҳои ҷамъоварии дар баъзе муассисаҳои тиббӣ, аз ҷумла, дар беморхонаи ноҳияи Рӯдакӣ паён доштанд.
Тандурустӣ яке аз соҳаҳои ҳассос барои ҳар як давлат ва ҷомеа мебошад. Сифат ва дастрасии хизматрасониҳои тиббӣ ба ҳаёт ва саломатии мардум бевосита вобаста аст ва ҳолатҳои ҷамъоварии маблағи ғайриқонунӣ метавонад ба тамоми низоми тандурустӣ доғ гузорад.
Ба иддаои ин вазорат, бо мақсади таъмини иҷрои саривақтӣ ва мақсадноки Стратегияи давлатии муқовимат ба коррупсия дар Ҷумҳурии Тоҷикистон барои то соли 2030 ва нақшаи чорабиниҳои амалисозии он барои марҳилаи якум (солҳои 2021 -2025) бо фармоиши дахлдори Вазорати тандурустӣ нақшаи чорабиниҳои татбиқи Стратегияи муқовимат бо коррупсия барои то солҳои 2022 тасдиқ гардида, иҷрои он дар ҳама муассисаҳои сатҳи ҷумҳуриявӣ ва шаҳру ноҳиявӣ таъмин гардид.
Инчунин бо мақсади иҷрои қарори Ҳукумати Ҷумҳурии Тоҷикистон аз 28 октябри соли 2016 «Дар бораи методологияи тартиб ва методикаи гузаронидани таҳлили фаъолият» бо фармоишҳои дахлдори Вазорат гурӯҳи корӣ оид ба баҳодиҳии хавфҳои коррупсионӣ дар Вазорати тандурустӣ ва ҳифзи иҷтимоии аҳолӣ таъсис дода шуда, нақшаи амал вобаста ба баҳодиҳӣ ва бартараф намудани хавфҳои коррупсионӣ барои солҳои 2023 -2024 тасдиқ гардид.
Соли гузашта Вазорати тандурустӣ ва ҳифзи иҷтимоии аҳолии Тоҷикистон якҷо бо Агентии назорати давлатии молиявӣ ва мубориза бо коррупсияи таҳти унвони «Муқовимат ба коррупсия-кафили рушди соҳаҳои тандурустӣ ва ҳифзи иҷтимоии аҳолӣ» конференсияи ҷумҳуриявӣ баргузор намуд. Дар ин конфронс директори Сулаймон Султонзода, директори Агентии назорати давлатии молиявӣ ва мубориза бо коррупсия ва Ҷамолиддин Абдуллозода, вазири тандурустӣ ва ҳифзи иҷтимоии аҳолӣ ширкат карда буданд.
Аввали июни соли 2025 Агентии назорати давлатии молиявӣ ва мубориза бо коррупсия дар Муассисаи давлатии «Маркази ҷумҳуриявии илмии саратоншиносӣ»-и Вазорати тандурустӣ ва ҳифзи иҷтимоии аҳолии Ҷумҳурии Тоҷикистон бо кормандони соҳаи намояндагони Агентӣ бо маърӯза баромад карда, қонунгузории Ҷумҳурии Тоҷикистон ва барномаҳои давлатии зиддикоррупсиониро мавриди баррасӣ қарор доданд. Таъкид гардид, ки коррупсия дар соҳаи тандурустӣ ба дастрасии ёрии тиббии ройгони давлатӣ монеа эҷод карда, ба саломатии аҳолӣ, пешгирии бемориҳо ва шаффофияти хизматрасонии тиббӣ халал мерасонад. Иштирокчиёнро даъват намуданд, ки тавассути баланд бардоштани маърифати ҳуқуқии зиддикоррупсионӣ аз амалҳои коррупсионӣ худдорӣ намуда, қонунҳои соҳавиро дар самти муқовимат ба коррупсия дар фаъолияташон қатъиян риоя намоянд.
Дар маҷмӯъ чорабинӣ дар фазои зиддикоррупсионӣ сурат гирифта, ба итминон метавон гуфт, ки натиҷаҳои он таъсири мусбии худро ҷиҳати дар ҷомеа ба вуҷуд овардани муносибати оштинопазир ба падидаи коррупсия ва баланд бардоштани маърифати ҳуқуқии иштирокчиён нақши муҳим мерасонад.
