Коргоҳи дӯзандагии «Содот» дар шаҳри Ваҳдат воқеъ буда, роҳбари ин коргоҳ Сафуро Назрии 21-сола аст. Ӯ се сол қабл ҳамроҳи хонаводааш ба Тоҷикистон омад. Сафуро хост ҳунаре барои худ касб кунад ва ба омӯзиши хайётӣ пардохт…
Дар коргоҳи дӯзандагии «Содот» се устод ба 8 шогирд омӯзиш медиҳанд, ки 6 шогирд аз оилаи муҳоҷирини Афғонистон ҳастанд.
Ин коргоҳ дар нозироти андоз ба қайд гирифта шудааст ва андоз мепардозад.
Арзиши дӯхти либос дар ин коргоҳ вобаста ба матоъ ва дизайни он аст. Фармоишҳо аз 50 то 300 сомонӣ нарх дорад.
Сафуро Назрӣ мегӯяд, ба Тоҷикистон омада, зуд ба омӯзиши хайётӣ пардохт. Бо сайъу талош дӯзандагиро ёд гирифт.
“Баъди он ки дӯзандагиро ёд гирифтам, оҳиста-оҳиста ба кор оғоз кардам. Дар аввал мо васоили хеле содаву одӣ доштем. Дар доираи лоиҳаи USAID дарс гузаштем. Баъди иштирок дар омӯзиш тарҳи тиҷоратии худро пешниҳод кардем. Лоиҳае, ки доштем, бо устод тарҳрезӣ кардем ва нақшаи худро пешниҳод кардем. Баъд аз он ба мо васоил доданд ва мо тавонистем ин ҷоро боз кунему шогирд гирем.”,-нақл кард Сафуро.
Дар акси асосӣ Сафуро Назрӣ
Фаъолияти ин муҳоҷирони афғонистонӣ як навъ соҳибкории иҷтимоӣ мебошад. Қарор аст дар Тоҷикистон қонун “Дар бораи соҳибкории иҷтимоӣ” қабул гардад.
Лоиҳаи қонун муҳоҷирон ва паноҳандагонро ба қишри осебпазири ҷомеа шомил мекунад.
