TikTok аз ҷониби Думаи давлатии Русия арзёбӣ мешавад. «Пеш аз қабули қарор дар бораи бастани шабакаи иҷтимоии TikTok дар Русия, бояд фаҳмид, ки ба талаботи қонунгузории Русия мувофиқат мекунад ё не.»-дар ин бора Антон Немкин, узви Кумитаи сиёсати иттилоотӣ, технологияҳои иттилоотӣ ва иртибототи Думаи давлатӣ ба зимни як мусоҳиба бо нашрияи парлумонӣ изҳори назар кардааст.
Ба гуфтаи ӯ, дар сурати риоя накардани қонун шабакаи иҷтимоӣ амалаш маҳдуд хоҳад шуд. Вакил ёдовар шуд, ки дар соли 2022 маъмурияти ТикТок мустақилона паҳнсозии мундариҷаи нав ва имкони пахши мустақим дар Русияро ба далели пайдо шудани «фейкҳо дар бораи амалиёти махсуси низомӣ ва артиши Русия» мутаваққиф кард. Ҳамзамон, дар ин пойгоҳ мундариҷаи мамнӯъро метавон ёфт.», -гуфтааст Немкин.
«Маълум аст, ки дар як катор мавзуҳо ҳануз ҳам фаҳмиш ба даст наомадааст. Ҳамаи ин ҳолатҳо бояд аз ҷониби TikTok ба назар гирифта шаванд, агар шабакаи иҷтимоӣ тасмим гирад, ки корро дар кишвари мо дубора оғоз кунад. Аввалан, нест кардани ҳама мундариҷаи мамнӯъ, дуюм — риояи ҳама талаботи қонуни «десант». Пас метавон гуфт, ки кори ин шабакаи иҷтимоӣ дар кишвари мо умуман имконпазир аст.”, — хулоса кардааст ӯ.
Рӯзи 13 май танзимгари соҳа дар Русия-Роскомнадзор ба ТикТок дархост фиристода, талаб кард, ки дар бораи риояи ду қонуни федералӣ — «Дар бораи маълумоти шахсӣ» ва «Дар бораи иттилоот, технологияҳои иттилоотӣ ва ҳифзи иттилоот» гузориш пешниҳод кунад. Дар сурати ошкор шудани вайронкунии талаботи қонун, танзимкунанда ҳуқуқ дорад чораҳои пешбининамудаи қисми 3.1 моддаи 23-и Қонуни федералии «Дар бораи маълумоти шахсӣ», аз ҷумла маҳдуд кардани дастрасӣ ба иттилоотро андешад.
Ёдовар мешавем, ки охири моҳи апрели соли равон Ҷо Байден, президенти Амрико, тарҳи қонунеро имзо кард, ки манъи дастрасӣ ба TikTok-ро дар он кишвар мадди назар дорад. Пештар аз ин, Сенат ва Палатаи намояндагони Амрико манъи фурӯши ин барномаро дар фурӯшгоҳҳои Apple ва Google тасдиқ карда буданд.
Ҷонибдорони маҳдуд кардани TikTok мегӯянд, ин шабака ба амнияти миллии Иёлоти Муттаҳида хатар дорад. Ба бовари онҳо, ҳукумати Чин метавонад аз ширкати ByteDance, ки молики ТикТок аст, маълумоти шахсии корбарон аз Амрикоро талаб кунад.
