Овозхон ва блогери тоҷик, ки дар шабакаҳои иҷтимоӣ бо тахаллуси «Федя гитарист» маъруф аст, аз чӣ гуна шикаста шудани саҳифааш дар ютуб муфассал қисса кард.
Ба нақли ин ҷавон, чанде пеш як ширкати Питса тариқи почта ба ӯ муроҷиат кард то маҳсулоти онҳоро таблиғ намояд.
Чаҳор сол қабл Фатҳиддин ба блогери шурӯъ кард. Ӯ асосан тариқи шабакаҳои Hamatarafa Live ва Hamatarafa Live2 дар ютуб маводҳои хешро нашр мекард, ки шабакаи якуми 809 ҳазор ва дуввумӣ 151 ҳазор пайрав дорад.
«Номаро кушодем, навишта шуда буд, ки барои хондани шартнома ба пайвандро (ссылка) боз кунем ва дар он ҷо ҳама чиз дар бораи реклама ва пайванди видео вуҷуд дорад. Шартномаро хондем, танҳо дидани видео боқӣ монда буд, вақте хостем ин пайвандро тариқи телефон кушоем, вале натавонистем. Пас, мо ба рекламадиҳанда навиштем, ки ин кор тариқи телефон ғайриимкон аст. Ба мо пешниҳод шуд, ки тариқи компютер пайвандро боз кунем. Вақте тавассути компютер онро боз кардан хостем, мушкили техникӣ пеш омад, компютеро беҳаракат монд (часпид). Мо антивирус насб кардем, компютерро хомӯш кардем, вале ба телефон мактуб омад, ки шумо рамзҳоро дигар кардед. Пас аз ин, мо ба канал дастрасӣ надоштем.»,-нақл мекунад Фатҳиддин.
Фатҳиддин мегӯяд, ин амал барояш дарсе буд ва ҳатман минбаъд ба ҳар пайванд ҷиддӣ муносибат мекунад. Ӯ ба дигарон низ тавсия медиҳад, ки ҳушёру огоҳ бошанд то ба чунин мушкил рӯ ба рӯ нагарданд.
View this post on Instagram
