Мирвайс Мирвайсов донишҷӯи соли дуюми риштаи барномасозӣ дар Ҳиндустон аст. Ӯ дар барномаи “Бол” аз таҳсилу зиндагияш ба мо қисса кард.
Мирвайс то соли 2021 донишҷӯи Донишгоҳи давлатии Хуҷанд буд ва тариқи барномаи “Study in India” ба Ҳиндустон роҳ ёфт. Барномаи мазкур ба ҷавонони хориҷ имкони таҳсил дар ин кишварро медиҳад.
Мирвайс ройгон таҳсил мекунад ва хобгоҳ, таъмини ғизову нақлиёт низ аз ҳисоби муассисаи олӣ аст.
«Дар донишгоҳ ҳамроҳи мо аз 65 давлати дунё таҳсил мекунанд. Ҳар рӯз бидуни танаффус 6 соат дарс мехонем. Дарсҳо дар умум хуб ҳастанд ва дар ҳоли ҳозир забонҳои барномасозиро меомӯзам. Муносибати муаллимон хуб аст.»,-мегӯяд Мирвайс.
Ҳамхонаи Мирвайс дар хобгоҳ аз Гана аст. Бо ҳам муносибати бародарона доранду мақсад гузоштаанд, ки соли оянда ба Тоҷикистон оянд ва соли 2024 ба Гана. Хуллас, аз дарсу донишгоҳ, хобгоҳу ҳамкурсонаш розист.
Мирвайс блогерӣ низ мекунад бо муҳтавои ҳаҷвияш чанд вақти охир сербинанда аст. Ӯ ҳоло дар Instagram зиёда аз 20 ҳазор обуначӣ дошта, ҳамарӯза наворҳои нав пешниҳод мекунад.
«Дар аввал рэп мехондам ва дар Instagram мегузоштам, вале муваффақ нашудам. Сипас навори ҳаҷвие таҳия кардам, ки аз ҷониби мардум хуб қабул шуд. Ҳамин тавр, самти корам дар соҳаи блогинг муайян шуд ва ҳоло дар вақтҳои бекориям ба сабту таҳияи наворҳои ҳаҷвӣ машғулам.», — афзуд Мирвайс.
Бархе наворҳояшро 600 ҳазор тамошо кардаанд. Чандин бор саҳифаҳояш дар Tik-Tok масдуд шудаанд.
Ҳафизуллоҳ Тоҳирӣ
