Акмалиддин Каримов дар мусобиқоти байналмилалии “Ҷоми Поягузорони самбо”, ки рӯзҳои 10-11-уми сентябр дар пойтахти Федератсияи Русия доир гардид, мақоми аввалро касб намуда медали тилоро соҳиб шуд. Ӯ (вазни 58 кг) дар финал Харун Тлишевро аз Русия мағлуб кард.
Акмалиддин Каримов, соли гузашта низ дар мусобиқаи ҷаҳонии самбо (дар шаҳри Тошканд) пас аз се пирӯзӣ бар варзишгарони давлатҳои Тринидад ва Тобаго, Марокаш ва Қазоқистон ба даври ниҳоии мусобиқаи қаҳрамонии ҷаҳон роҳ ёфт. Ӯ дар марҳилаи ниҳоӣ бар ҳарифи русаш Саян Ҳертек пирӯз шуда, медали тиллоро соҳиб гардид.
Ёдовар мешавем, ки Акмалиддин Каримов, барандаи чор медали нуқраи мусобиқоти ҷаҳонии самбо низ ҳаст ва соли гузашта дар 30-солагӣ бори аввал медари тилоро ба даст овард. Акмалиддин Каримов баъди он пирӯзӣ сахт гирист.
“Баъди ноҳақиҳои зиёди доварон дар ниҳоят ба орзуи деринааи худ расидам ва дигар ёд надорам, ки дар чи ҳолат будам. Ҳамин тавр, ашки чашмонам ҷорӣ шуд.
Тӯли даҳ сол ин қадар меҳнат кардам, билохира ба ин унвон ноил шудам ва баъди қаҳрамонии ҷаҳон дар хотир надорам, чи кор кардам. Мисле ки аз ҳуш беҳуш мешавӣ, ҳамин ҳолат ба ман рӯх дод.”-нақл намуда буд ба jom.tj.
Дар шабакаҳои иҷтимоӣ аз ӯ тавсиф мешавад, ки бо зиндагии хоксоронаву заҳамоти зиёд Акмалиддин натиҷаи дилхоҳ ба даст овард.
Акс аз сомонаи https://sambo.ru/
