Моҳикалон Холова, сокини Ховалинг-яке аз ноҳияҳои дурдасти вилояти Хатлон буда, 33 сол аст, ки кафшдӯзӣ мекунад. Кафшдӯзӣ ягона манбаи даромадӣ ӯ маҳсуб мешавад. Ин ҳунарро аз шавҳараш омӯхтааст. Қаблан Моҳикалон бо шавҳараш кафшдӯзӣ мекард, вале дар рафти зиндагии якҷоя соҳиби писар нагардиданд. Бинобар ин, шавҳараш ӯро тарк намуда, ба муҳоҷират меравад. Моҳикалон кораш-кафшдӯзиро тарк накарда, баръакс, ба духтаронаш низ омӯзонд.
“Ман бо ҳунар ҳамаи духтаронамро хонадор кардам ва камбудиҳои рӯзғорро комил. Як духтарам бемори вазнин гардида буду дар беморхона бистарӣ шуд. Ӯро бе ёрии касе табобат кардам. Аз ин рӯ, ман ин касбро барои худ муқаддас медонам. Маро шавҳарам бинобар таваллуд накардани писар тарк намуд, вале ман ин касбро тарк накардам, зеро, хор мешудам”,- мегуяд Холова Моҳикалон.
Моҳикалон Холова дар маркази ноҳияи Ховалинг дукони кафшдӯзӣ дорад ва ҳамарӯза машғули ин кор аст. Духтаронаш низ дар хонаи шавҳар кафшдӯзӣ мекунанд. Дукони яке аз духтаронаш наздик ба дукони модар аст.
Моҳикалон Холова нозукиҳои ин касбро афроди зиёде омӯзондааст. Теъдоди шогирдонаш беш аз 50 нафаранд.
Дар ноҳияи Ховалинг аксарият Моҳикалонро мешиносанд ва ҳамагӣ пойафзолашонро барои таъмир назди ӯ мебаранд. Ҳамзамон, ӯ дар баробари таъмири пойафзол, анвои гуногуни пойафзолро омода мекунад. Вай бо истифода аз латтапора ва намад барои мардони деҳот кафшҳои махсус медӯзад, ки онро ҳангоми дарав ва дигар корҳои хоҷагӣ мепӯшанд.
Баҳруллои Маҳмадшариф
