Беш аз 10 сол мешавад, ки Наврӯз ба як ҷашни байналмилалӣ табдил шуда, ҷаҳон аз он бошукӯҳ таҷлил мекунад. Ёдовар мешавем, ки 23 феврали соли 2010 Ассамблеяи Генералӣ 21 мартро ҳамчун Рӯзи байналмилалии Наврӯз эътироф кард ва аллакай Наврӯз ба Рӯйхати намояндагии мероси ғайримоддии фарҳангии башарӣ ворид шудааст.
Расму ойин ва суннатҳои наврӯзӣ дар вуҷуди хеш падидаҳои барҷастаи инсонгароӣ ва маънавиёти баландро ҷой дода, шинохти ҳақиқати онҳо ба худогоҳии маънавӣ ва худшиносии миллӣ, инчунин, тавсеаи фарҳанги ахлоқии ҷомеа мусоидат мекунад.
Яъне сабаби дар паҳноҳои пурвусъати ҷуғрофӣ паҳн гардидани Наврӯз дар он аст, ки асли Наврӯз ба сифати ҷашни табиатан ва моҳиятан оммавию мардумӣ аз андешаи баробарӣ дар байни инсонҳо иборат мебошад.
Ба феҳрести ҷаҳонии осори фарҳангӣ дохил шудани Наврӯзи хуҷастапай воқеаи муҳимме дар ҳаёти фарҳанги башарӣ буда, ба ҷуз Тоҷикистон, Озарбойҷон, Қазоқистон, Туркманистон, Қирғизистон, Ӯзбекистон, Албания, Косово, Афғонистон ва Эрон дар чандин кишвари дигар аз Наврӯз таҷлил мегардад
Ҳоло дар Хитойи Ғарбӣ (Урумчй, Кошғар ва Ёрканд), Покистони Шимол, (Ганза ва Гилгит), байни форсҳои Ҳинд, курдҳои Ироқу Сурия, дар Гурҷистон, Занзибар (дар Африка) Наврӯз ҷашн гирифта мешавад.
Ҳайати эҷодии сомонаи «ҶОМ» аз фурсати муносиб истифода намуда, хонандаи азизро ба ин ҷашни байналмилалӣ таҳният мегӯяд!
Наврӯз муборак!
