Як қатор доварон аз Тоҷикистон, ки ба гурӯҳи нухбагони Конфедератсияи футболи Осиё шомил шудаанд, барои хадамоти бозиҳои мусобиқоти интихобии Ҷоми Осиё-2023 байни дастаҳои наврасон (U-17) ва ҷавонон (U-20) таъин шуданд.
Ба иттилои ФФТ, довари ФИФА Сайёдҷон Зайниддинов ва ёвари довари ФИФА Акмал Бӯриев дар мусобиқаи интихобии Ҷоми Осиё-2023 (U-17) дар гурӯҳи «Е», ки аз 5 то 9 октябр дар Дакка, пойтахти Бангладеш баргузор мешавад, кор хоҳанд кард.
Довари дигар дар қатори элитаҳои КФО — довари ФИФА Гулмуроди Саъдулло ва ёвари довари ФИФА Вафо Қараев бозиҳои мусобиқаи интихобии Ҷоми Осиё-2023 (U-17) дар чаҳоргонаи «С»-ро доварӣ мекунанд. Бозиҳои ин гурӯҳ аз 5 то 9 октябр дар Маскати Уммон баргузор мешаванд.
Илова бар ин, доварони мо мусобиқаи интихобии Ҷоми Осиё-2023 байни дастаҳои ҷавонони то 20-соларо доварӣ мекунанд. Довари ФИФА Насрулло Кабиров ва ёвари довари ФИФА Исмоил Нуралиев аз 10 то 18 сентябр бозиҳои гурӯҳи «С»-ро дар Лаос доварӣ хоҳанд кард ва Гулмуроди Саъдулло, довари ФИФА ва ёвари довари ФИФА Ҳасан Каримов барои доварии бозиҳо дар чаҳоргонаи «J» ба Бишкек мераванд.
