Кристи Ноэм, ки дар ҳукумати Доналд Трамп сиёсати сахти муҳоҷиратиро пеш мебурд, охири моҳи март аз вазифаи вазири амнияти дохилии Иёлоти Муттаҳидаи Амрико канор меравад. Ба ҷои ӯ президент пешниҳод кардааст, ки сенатори ҷумҳурихоҳ Маркуэйн Маллин ба ин мақом таъин шавад. Трамп дар ин бора рӯзи 5 март дар шабакаи иҷтимоии Truth Social хабар дод.
Истеъфои Ноэм пас аз фишори демократҳо дар Палатаи намояндагони Конгресси ИМА ба миён омад, ки ба талаботи онҳо чанд ҷумҳурихоҳ низ ҳамроҳ шуданд.
Баҳс пас аз кушта шудани ду шаҳрванди ИМА — Рене Гуд ва Алекс Претти аз ҷониби кормандони хадамоти муҳоҷират дар шаҳри Миннеаполис сар зад. Ноэм онҳоро «террористони дохилӣ» номида, ҳатто баъд аз равшан шудани ҳолатҳои марги онҳо аз узрхоҳӣ худдорӣ кард.
Баҳси дигар ба маъракаи таблиғотӣ ба маблағи 220 миллион доллар марбут буд, ки дар он Ноэм савори асп дар пасманзари кӯҳи Mount Rushmore наворбардорӣ шудааст. Дар ҷаласаи парлумон ӯ гуфтааст, ки буҷаи ин маъракаро шахсан Трамп тасдиқ кардааст, аммо президент дар суҳбат бо Reuters ин иддаоро рад кард.
