Исмоил Бақоӣ, сухангӯи Вазорати корҳои хориҷии Эрон ба радиои Амрико NPR дар посух ба савол оид ба эҳтимоли музокироти дубора бо ҳукумати ИМА таъкид кардааст, «мо ду маротиба дар миёни музокирот бо ҳукумати Амрико қарор доштем, ки мавриди ҳамла қарор гирифтем. Аз ин рӯ, ҳоло тамоми диққати мо ба дифоъ аз миллати худ равона шудааст. Ба мо ҳамла шудааст. Ин ҷанги ноодилонаест, ки бар миллати мо таҳмил гардидааст ва равиши мо дар баробари он истодагӣ, ҳифзи пойдорӣ ва муқобила бо ин беадолатӣ мебошад.»
Ӯ бо баёни он ки «мо хостори ҷанг нестем ва он чи имрӯз дар минтақа рух медиҳад, натиҷаи таҷовузи Амрико ва Исроил алайҳи Эрон аст», -афзуд: «Дар чунин шароит барои мо чӣ интихобе боқӣ мемонад? Мо аз мардум ва шаҳрвандони худ ҳимоят мекунем. Мо маҷбурем посух диҳем. Таърихи тӯлонии мо ба мо омӯхтааст, ки бояд аз худ дифоъ кунем. Ҳамзамон, ҷомеаи байналмилалӣ ва ҳамаи давлатҳо бояд нисбат ба собиқаи хатарноке, ки ин ҳамла эҷод мекунад, ҳушёр бошанд. Агар ин ба як қоида табдил ёбад, ки ҳар кишвар танҳо ба сабаби норозигӣ аз миллати дигар ба худ иҷозаи ҳамла диҳад ва роҳбарони он кишварро террористона аз байн барад, дар он сурат мо ба сӯи “қонуни ҷангал” босуръат ҳаракат хоҳем кард.»
Сухангӯи Вазорати корҳои хориҷӣ бо таъкид бар он ки амалҳои Иёлоти Муттаҳида ва Исроил алайҳи Эрон ҳамла ба Оинномаи Созмони Милали Муттаҳид ва ҳуқуқи байналмилалӣ мебошад, изҳор доштааси: «нахустин мушакҳое, ки ба сӯи Эрон партоб шуданд, ба як мактаби ибтидоӣ дар шаҳри Минаб дар ҷануби кишвар бархӯрд карданд. То кунун беш аз 158 духтари ноболиғи бегуноҳ ҷони худро аз даст додаанд ва бархе ҳанӯз зери вайронаҳо қарор доранд. Имрӯз ҳам бемористонҳо ва марказҳои табобатӣ дар маркази Теҳрон ҳадаф қарор гирифтанд. Ҳатто Ҷамъияти Ҳилоли Аҳмари мо низ мавриди зарба қарор гирифт. Ин иқдомҳо бидуни ҳеҷ далеле анҷом мешаванд. Ин як таҷовузи таҳрикнашуда ва беасос аст.»
