Президенти Ҷумҳурии Тоҷикистон Эмомалӣ Раҳмон ба муносибати Рӯзи ҷаҳонии футбол паёми шодбошӣ ирсол намуда, тамоми дӯстдорони варзиш ва ҳаводорони футболро табрик гуфт.
Эмомалӣ Раҳмон таъкид кард, ки Рӯзи ҷаҳонии футбол бо ибтикори роҳбарияти Федератсияи футболи Тоҷикистон ва тавассути қатъномаи махсуси Созмони Милали Муттаҳид эълон шуда, ҳамасола 25 май дар саросари ҷаҳон таҷлил мегардад.
Президенти кишвар футболро на танҳо як намуди варзиш, балки омили муҳими таҳкими дӯстӣ, ҳамдигарфаҳмӣ ва ҳамбастагии халқҳо арзёбӣ кард. Ба гуфтаи ӯ, эътирофи Рӯзи ҷаҳонии футбол бо ташаббуси Тоҷикистон нишонаи баланд гардидани нуфузи кишвар дар арсаи байналмилалӣ мебошад.
Сарвари давлати Тоҷикистон ҳамчунин зикр намудааст, ки баъди ба даст овардани истиқлол рушди футбол дар Тоҷикистон марҳилаи навро оғоз кард. Ӯ аз бунёди варзишгоҳҳои муосир, таъсиси мактабҳои футбол ва ҷалби наврасону ҷавонон ба варзиш ҳамчун бахши муҳими сиёсати давлатӣ ёдовар шуд.
Дар паём таъкид гардид, ки дар арафаи таҷлили 35-солагии истиқлоли давлатӣ дар шаҳри Душанбе Варзишгоҳи миллӣ барои 30 ҳазор тамошобин мавриди истифода қарор дода мешавад.
Президенти Тоҷикистон изҳори боварӣ кард, ки футболбозон, мураббиён ва мутахассисони соҳа минбаъд низ бо дастовардҳои худ парчами кишварро дар мусобиқаҳои байналмилалӣ баланд мебардоранд.
Дар анҷоми паём сарвари давлат Рӯзи ҷаҳонии футболро ба тамоми дӯстдорони варзиш ва ҳаводорони футбол муборакбод гуфт.
