Мақомоти иёлати Ню-Мексико аз ширкати Meta талаб доранд, ки 3,7 миллиард доллар пардохт карда, ҳамчунин механизмҳои кори платформаҳои худро тағйир диҳад. Дар ин бора Reuters ва CNBC бо истинод ба маълумоти ҳисоботии ширкат хабар додаанд. Ширкат ба истифодаи механизмҳое муттаҳам мешавад, ки вобастагӣ ба вуҷуд меоранд.
Мурофиаи додгоҳӣ идомаи парвандаест, ки мақомоти Ню-Мексико алайҳи ширкат боз карда буданд. Аввалин чунин даъво ҳанӯз соли 2023 пешниҳод шуда буд. Моҳи марти соли ҷорӣ додгоҳ қарор кард, ки ширкат сатҳи зарурии ҳифзи саломатии кӯдакон ва наврасонро таъмин намекунад ва инчунин Meta-ро ба пардохти ҷарима муваззаф намуд.
Ҳоло додгоҳ бояд арзёбӣ кунад, ки оё ширкат «қонуншикании дорои аҳамияти ҷамъиятӣ» содир кардааст ё не. Агар додгоҳ ба чунин хулоса бирасад, метавонад қарор диҳад, ки Meta бояд ба механизмҳои кори худ тағйирот ворид карда, ҷарима пардохт намояд. Вакили дифои ширкат аллакай изҳор доштааст, ки ин парванда «ба ҷомеа ва ҳуқуқҳои оммавӣ рабт надорад, балки танҳо манфиатҳои гурӯҳе аз корбаронро дар бар мегирад».
Тавре Reuters менависад, мақомоти дигар иёлатҳо, роҳбарони мактабҳо ва дигар сохторҳо ҷараёни ин мурофиаро бодиққат пайгирӣ мекунанд, зеро ин қазия «метавонад барои дигар парвандаҳои шабеҳи чунин навъ ба як прецедент табдил ёбад».
