Apple дар доираи созиши додгоҳӣ вобаста ба даъвои гурӯҳӣ 250 миллион доллар пардохт мекунад. Ширкатро ба гумроҳ кардани истеъмолкунандагон дар бораи функсияҳо ва имкониятҳои нави зеҳни сунъӣ муттаҳам карда буданд.
Соли 2024 Apple маъракаи таблиғотии хадамоти зеҳни сунъии худро бо номи Apple Intelligence оғоз карда буд. Аммо баъдтар ширкат ҷорӣ кардани ин хизматрасониҳоро ба муҳлати номуайян мавқуф гузошт.
Дар даъвое, ки соли гузашта алайҳи ширкат пешниҳод шуд, гуфта мешуд, ки Apple «бо мақсади зиёд кардани фурӯши iPhone таблиғоти ғайриодилона паҳн кардааст». Ширкат гуноҳи худро эътироф накард, аммо розӣ шуд, ки ба сокинони ИМА, ки аз моҳи июни соли 2024 то моҳи марти соли 2025 iPhone 15 ва iPhone 16 харидорӣ кардаанд, аз 25 то 95 доллар пардохт намояд.
«Apple имкониятҳои зеҳни сунъиро таблиғ мекард, ки он замон вуҷуд надоштанд, ҳоло ҳам вуҷуд надоранд ва эҳтимол то ду сол ё бештар аз он низ пайдо нахоҳанд шуд, агар умуман рӯзе ба вуҷуд оянд.», — изҳор доштанд вакилоне, ки манфиатҳои харидоронро ҳимоят мекарданд.
Онҳо ҳамчунин қайд карданд, ки Apple маъракаи густурдаи вобаста ба зеҳни сунъиро барои қафо намондан аз бозигарони бузурги соҳа, ба мисли OpenAI ва Anthropic, роҳандозӣ кардааст.
