Иёлоти Муттаҳидаи Амрико маркази пешсафи ҷаҳонӣ дар соҳаи марказҳои коркарди додаҳо (дата-cентрҳо) ба шумор меравад. Шумораи онҳо дар ин кишвар ду баробар бештар аз Иттиҳоди Аврупо аст. Олмон ва Британияи Кабир ҳатто аз Чин пеш гузаштаанд. Пойгоҳи Euronews Next шумораи чунин марказҳо ва омилҳои ҷалби сармоягузориро баррасӣ кардааст.
Дар гузориши AI Index 2026, ки аз ҷониби Институти зеҳни сунъии ба инсон нигаронидашудаи Донишгоҳи Стэнфорд нашр шудааст, гуфта мешавад, ки марказҳои коркарди додаҳо «ҷое мебошанд, ки қувваҳои ҳисоббарорӣ мутамарказ шудаанд». Дар гузориш таъкид мегардад, ки «иқтидор, ҷойгиршавии ҷуғрофӣ ва занҷираҳои таъминоти онҳо муайян мекунанд, ки кадом навъи системаҳои зеҳни сунъӣ метавонанд сохта шаванд ва дар куҷо».
Соли 2025 дар Амрико 5 427 маркази коркарди додаҳо мавҷуд буд. Олмон 529 ва Британияи Кабир 523 маркази коркарди додаҳоро доштаанд. Ҷолиб он аст, ки онҳо аз Чин пеш гузаштаанд. Чин дорои 449 маркази коркарди додаҳо аст.
Канада 337, Фаронса 322 ва Австралия 314 низ аз ҷумлаи кишварҳое мебошанд, ки зиёда аз 300 маркази коркарди додаҳо доранд. Ҳоланд бо 298 марказ ба ин нишондод наздик аст.
Дар аксари кишварҳои дигар шумораи чунин марказҳо аз 300 камтар аст. Русия 251 ва Ҷопон 222 марказ доштаанд.
Марказҳои коркарди додаҳо асоси фаъолияти зеҳни сунъӣ мебошанд ва кори хадамоти гуногунро таъмин мекунанд, аз дархостҳо ба чат-ботҳои зеҳни сунъӣ то пахши видео ва нигоҳдории файлҳо дар «абр».
Инҳо иншооти бузурганд, ки дар онҳо серверҳо, системаҳои нигоҳдории маълумот ва таҷҳизоти шабакавӣ ҷойгир шудаанд. Онҳо барои нигоҳдорӣ, коркард ва паҳн кардани маълумот истифода мешаванд. Ҳар қадаре ки чунин марказҳо зиёд бошанд, ҳамон қадар имкониятҳо барои рушди зеҳни сунъӣ бештар мегардад. Аммо онҳо миқдори зиёди нерӯи барқ истифода карда, ба заминҳои васеъ ниёз доранд.
ПИСАНД ОМАД? БО ДӮСТОНИ ХУД МУБОДИЛА КУНЕД!
+1
+1
+1
+1
+1
+1
+1
