Аморати Муттаҳидаи Араб (АМА) эълон кард, ки қарор дорад аз Созмони кишварҳои содиркунандаи нафт (ОПЕК ва ОПЕК+) аз 1 май хориҷ шавад.
«Ин қарор пас аз таҳлили ҳамаҷонибаи сиёсати истеҳсолии АМА, ҳамчунин имкониятҳои кунунӣ ва ояндаи истеҳсолии он қабул гардида, бар асоси манфиатҳои миллӣ ва талош барои саҳмгузории муассир дар қонеъсозии ниёзҳои бозор гирифта шудааст», — таъкид мешавад дар хабарнома.
Ин иқдом бозгӯи дидгоҳи дарозмуддати стратегӣ ва иқтисодии АМА буда, инчунин тағйирот дар бахши энергетикии кишвар, аз ҷумла суръат гирифтани сармоягузорӣ ба рушди истеҳсоли дохилии неру ва тасдиқи ӯҳдадории Абу-Даби барои иҷрои «нақши масъулона, боэътимод ва ояндабин дар бозорҳои ҷаҳонии энергетикӣ» мебошад, омадааст дар идомаи хабар.
Пас аз хориҷ шудан аз созмонҳо, АМА «ба таври масъулона фаъолиятро идома медиҳад» ва тадриҷан, бо дарназардошти талабот ва шароити бозор, ҳаҷми иловагии маҳсулотро ба бозор мебарорад.
Вазири энергетикаи АМА Суҳайл ал-Мазруӣ ба Reuters изҳор дошт, ки хориҷ шудан аз ОПЕК ва ОПЕК+ ба кишвар чандирии бештар медиҳад. Ӯ афзуд, ки пеш аз қабули қарор АМА мустақиман бо дигар кишварҳо, аз ҷумла Арабистони Саудӣ машварат накардааст.
Ба гуфтаи Reuters, ин иқдом метавонад ба иттиҳодияҳои содиркунандаи нафт ва раҳбари амалии онҳо — Арабистони Саудӣ, зарбаи ҷиддӣ расонад.
Аморати Муттаҳидаи Араб соли 1967 ба ОПЕК пайваста буд, он вақт кишвар тавассути аморати Абу-Даби намояндагӣ мешуд ва баъди таъсиси давлат дар соли 1971 узвияти худро нигоҳ дошт.
