Бюрои федералии таҳқиқотии Амрико (FBI) барои онҳое, ки аъзои Handala Hack Team-ро ошкор мекунанд, 10 миллион доллар ҷоиза ваъда кардааст. Ин гуруҳро, ки марбут ба Эрон медонанд, ахиран эълон кард, ки шикастани почтаи электронии раҳбари FBI Каш Пател кори онҳост. Handala Hack Team аксҳои Пател, мукотибаи кории ӯ ва тарҷумаи ҳоли ӯро дар интернет нашр кард. Ин гуруҳи ҳакерӣ навиштааст, ки «ин танҳо оғоз аст».
Намояндаи ҳукумати Иёлоти Муттаҳидаи Амрико гуфтааст, ки ин мавод воқеӣ ба назар мерасад. Дар изҳороти Бюрои федералии таҳқиқотии Амрико гуфта мешавад, ки барои коҳиш додани хатари эҳтимолӣ тамоми чораҳои заруриро андешидааст.
Ҳамзамон, бюро таъкид кард, ки маълумоти паҳншуда ба иттилооти ҳукуматӣ рабт надорад ва асосан кӯҳна мебошад.
Дар аксҳое, ки бо нишони обии Handala Hack Team паҳн шудаанд, Каш Пател дар ҷойҳои гуногун — назди мошини ретро, ҳавопаймои хусусӣ, бо сигор, шишаи машрубот, инчунин дар тарабхонаҳо ва меҳмонхонаҳо дида мешавад.
