Майя Санду, Президенти Молдова изҳор доштааст, ки дар сурати баргузор шудани раъйпурсӣ (референдум) ӯ ба тарафдории пайвастани кишвараш ба Руминия овоз медиҳад.
Президенти Молдова Майя Санду гуфт, ки агар чунин раъйпурсӣ баргузор шавад, омода аст барои пайвастани кишвараш ба Руминия — узви НАТО ва Иттиҳоди Аврупо овоз диҳад.
Тибқи маълумоти агентии Reuters, аз 2,4 миллион сокини Молдова тақрибан 1,5 миллиони он шаҳрвандии Руминияро доранд. Бо вуҷуди ин, тибқи натиҷаҳои назарсанҷиҳо, танҳо тақрибан сеяки аҳолии кишвар аз идеяи муттаҳидии ду кишвар пуштибонӣ мекунад.
Ҳукумати Молдова ҳадаф гузоштааст, ки Молдова то соли 2030 ба узвияти Иттиҳоди Аврупо шомил шавад. Аммо барои расидан ба ин ҳадаф, Кишинёв бояд як қатор ислоҳоти мураккабро амалӣ намояд.
