Дар Британияи Кабир қонуне ба иҷро даромад, ки рекламаи ғизои зарароварро дар интернет комилан манъ мекунад ва пахши онро дар телевизион маҳдуд месозад. Ин чораҳои нав иҷрои ваъдаи мақомот барои «кумак ба волидон ҷиҳати ба воя расондани солимтарин насли кӯдакон дар таърих» мебошанд.
Тибқи қоидаҳои нав, рекламаи «ғизои камсолим»» дар телевизиони Британия танҳо пас аз соати 21:00 иҷозат дода мешавад. Дар бахши бритониёии интернет бошад, намоиши чунин эълонҳо ва роликҳо комилан манъ шудааст.
Ба иттилои рӯзномаи The Guardian, маҳдудиятҳо ба 13 гурӯҳи маҳсулоте дахл доранд, ки миқдори зиёди шакар, равған ва намак доранд. Аз ҷумла, инҳо нӯшокиҳо бо шакари иловашуда (аз ҷумла баъзе маҳсулоти ширӣ мисли йогурт), чипсҳо, крекерҳо ва печеньеи шӯр, кукурузпораҳо ва дигар «наҳории омода» бо шакар, попкорн, шоколад, сақич, яхмос, маҳсулоти қаннодии ширин, пицца ва хӯрокҳои яхкардашуда мебошанд.
Истеҳсолкунандагони «ғизои зараровар» дар Британия ҳанӯз ҳам ҳақ доранд, ки бренди худро дар вақти «кӯдакона» дар телевизион ва интернет таблиғ кунанд, ба шарте ки дар чунин реклама худи маҳсулоти зараровар мустақиман нишон дода нашавад. Расонаҳо қайд мекунанд, ки аксари ширкатҳои маҳаллӣ аллакай пешакӣ ба иҷрои ин талаботи нав шурӯъ кардаанд.
Ҳукумати Британия омореро пешниҳод мекунад, ки паҳншавии фарбеҳиро дар байни кӯдакон нишон медиҳад. Масалан, 22,1 фоизи кӯдакон ҳангоми рафтан ба синфҳои ибтидоӣ вазни зиёдатӣ ё фарбеҳӣ доранд. То поёни таҳсил ин нишондиҳанда ба 35,8 фоиз мерасад.
Реклама ба он таъсир мерасонад, ки кӯдакон чӣ ва кай мехӯранд, завқи онҳоро аз синни хурдсолӣ шакл медиҳад ва хатари фарбеҳӣ ва бемориҳои вобастаро зиёд мекунад.
Лондон аз миёнаҳои солҳои 2010-ум ба таври фаъол бо фарбеҳӣ мубориза мебарад. Соли 2018 дар Британияи Кабир «андози шакар» ҷорӣ карда шуд, ки тибқи он истеҳсолкунандагони нӯшокиҳои дорои миқдори зиёди шакар бояд ба буҷети давлат андози иловагӣ пардохт кунанд.
