Барномаи миллии рушди Ҷумҳурии Тоҷикистон барои солҳои 2026–2030 таҳия шудааст. Вале барои амалӣ гардидани он беш аз 200 миллард сомонӣ зарур аст.
Дар лоиҳаи ин барномаи нав, рақамикунонӣ, рушди саноат ва зеҳни сунъӣ, рушди иқтисодӣ дар асоси навоварӣ, илм ва ихтироот, рушди сармояи инсонӣ ва дигарҳои соҳаи муҳим инъикос гардидаанд.
Барои таҳияи барнома дар се зина гуруҳи кории байниидоравӣ таъсис шудааст. Аз ҷумла,
- Дар сатҳи муовини якуми сарвазир;
- дар сатҳи вазири рушди иқтисод ва савдо;
- ва дар сатҳи муовини вазири рушди иқтисод ва савдо.
Завқӣ Завқизода, вазири рушди иқтисод ва савдои Тоҷикистон мегӯяд, Барномаи миллии рушди Ҷумҳурии Тоҷикистон барои солҳои 2026–2030 бештар барои иҷрои ҳадафу афзалиятҳои Ҳукумати кишвар ва баланд намудани сатҳи зиндагии мардуми равона гардидааст.
Ин вазир аз ҷомеаи шаҳрвандӣ ва намояндагони ВАО изҳори ташаккур намуд, ки дар тавсияву пешниҳодҳои мушаххас ироа карданд.
«Бо роҳбарони вазорату идораҳо як мизи гирд баргузор намудем. Як мизи гирд бо шарикони рушд ва як мизи гирд бо намояндагони ҷомеаи шаҳрвандӣ гузарондем. Хушбахтона, Барномаи миллии рушди Ҷумҳурии Тоҷикистон барои солҳои 2026–2030-ро омода намуданд. Тахминан 206 миллиард сомонӣ барои тадбиқи ҳамин барнома зарур аст, бештар барои иҷрои ҳадафу афзалиятҳои Ҳукумати Ҷумҳурии Тоҷикистон, барои баланд намудани сатҳи зиндагии мардуми кишвар аст ва 4 ҳадафи стратегии кишвар. Ба ҷуз ҳадафҳои стратегии кишвар боз якчанд ҳадафҳои миёнамуҳлату самтҳои афзалиятнок ҳастанд, ки дар барнома зикр шудаанд.», -мегӯяд Завқӣ Завқизода.
Аввали моҳи августи соли 2025 дар Вазорати рушди иқтисод ва савдои Ҷумҳурии Тоҷикистон таҳти роҳбарии Вазири рушди иқтисод ва савдо Завқӣ Завқизода бо ҳамраиси Шӯрои ҳамоҳангсози шарикони рушд, Ҳамоҳангсози доимии СММ дар Тоҷикистон Парвати Рамасвами, намояндагони ҷомеаи шаҳрвандӣ, асотссиатсияҳои бахши хусусӣ ва коршиносони соҳавӣ ҷаласа баргузор шуда, лоиҳаи Барномаи миллии рушди Ҷумҳурии Тоҷикистон барои солҳои 2026-2030 баррасӣ шудааст.
Лоиҳаи Барномаи миллии рушди Ҷумҳурии Тоҷикистон барои солҳои 2026–2030 барои мувофиқа бо вазорату идораҳои кишвар равона гардидааст ва сипас ба баррасии Ҳукумати Тоҷикистон пешниҳод карда мешавад.
Сарчашмаи маблағгузори Барномаи миллии рушди Ҷумҳурии Тоҷикистон барои солҳои 2026–2030 инҳоянд:
- Маблағгузории буҷетӣ;
- Маблағгузории шарикони рушд;
- Маблағгузории бахши хусусӣ.
Маълумоти бештар дар навори ташреҳӣ:
